Yevgueni Prigozhin indicou este sábado que “hoxe, ás 12 horas [hora local], Bakhmut foi tomado por completo”. Neste sentido, lembrou os 224 días de combate na cidade e agradeceu “ao pobo ruso e aos combatentes de Wagner o seu apoio”.
Prigózhin tivo, tamén, palabras de agradecemento para Serguei Surovikin, comandante adxunto da Agrupación Conxunta de Tropas na zona, e para Mijaíl Mizíntsev, xefe do Centro Nacional de Xestión da Defensa de Rusia, "por darnos a oportunidade de levar a cabo esta difícil operación".
O propietario da compañía que dirixiu o combate contra os ucraínos na cidade referiuse ao presidente ruso, afirmando “grazas a Vladímir Vladimirovich Putin por darnos esta oportunidade, a alta honra de defender a nosa patria”.
Os combatentes de Wagner abandonarán a cidade a partir de 25 de maio, transferindo as liñas de defensa e as posicións de control da cidade ao Ministerio de Defensa ruso, con quen mantivo diverxencias ao longo desta batalla a compañía.
Artiomovsk
Bakhmut, coñecida en ruso por Artiomovsk, converteuse no escenario dalgúns dos combates máis longos e intensos do operativo ruso contra Ucraína. Malia descoñecerse a cifra de mortos totais nesta batalla, os analistas consideran que foron moi elevadas para ambos bandos.
As forzas armadas rusas e ucraínas resaltaron a importancia estratéxica desta cidade na loita polo control dos territorios de Donetsk. Neste sentido, explícase a grande cantidade de tropas e equipos destinados por ambos bandas para esta contenda.
O ministro de Defensa de Rusia, Serguei Shoigu, afirmou no mes de marzo que “esta cidade é un importante centro de defensa das tropas ucraínas en Donbass. O seu control permitirá realizar novas accións ofensivas profundamente na defensa das Forzas Armadas de Ucraína".
A cidade foi fundada a finais do século XVI co nome de Bakhmut . En 1924 foi nomeada como Artiómovsk en honra ao revolucionario bolxevique Fiodor Sergueiev, ao que se coñecía como Artiom. En 2016, a urbe volveu chamarse Bakhmut como parte de eliminación dos símbolos comunistas nesta área promovida polo Goberno ucraíno.
Resposta de Ucraína
As autoridades ucraínas explicaron ante o anuncio de Prigózhin que as súas forzas seguen combatendo nalgún distrito da cidade. A este respecto, o voceiro do Grupo de Forzas do Leste das Forzas Armadas de Ucraína, Serhi Cherevati, asegurou que “as súas forzas continúan loitando”.
A vice ministra de Defensa de Ucraína, Hanna Maliar, recoñeceu que a situación é "crítica" ante a chegada nos últimos días de reforzos rusos, pero asegurou que as súas forzas aínda “controlan algunhas instalacións industriais e de infraestrutura desta zona”.
