As rexións alemás de Baviera e Baixa Sajonia perseguirán a calquera que use a letra "Z" en público, un símbolo de apoio á guerra de Rusia contra Ucraína.
As persoas que "expresen publicamente a súa aprobación á guerra de agresión do presidente ruso Putin contra Ucraína utilizando este símbolo 'Z' enfrontarán consecuencias penais", dixo o ministro do Interior de Baixa Sajonia, Boris Pistorius, nun comunicado.
Desde o inicio da guerra en Ucraína, un 'Z' en branco apareceu sobre os tanques e uniformes das forzas rusas. O signo trasladouse desde entón a diversos espazos públicos, tanto en Rusia como fóra dese país. Viuse "en edificios, coches ou roupa", explicou o goberno de Baixa Sajonia.
Prohibición do símbolo
A pasada fin de semana alertou a cidadanía. Queda prohibido o uso dese símbolo, de apoio ás tropas rusas durante a guerra con Ucraína. E advertiu das posíbeis consecuencias penais.
O artigo 140 do Código penal alemán castiga con até tres anos de prisión e unha multa a quen aprobe publicamente as guerras de agresión.
O ministro de Xustiza de Baviera, Georg Eisenreich, afirmou que "todo o mundo pode expresar a súa opinión en Alemaña", pero "a liberdade de expresión termina onde empeza o código penal".
Primeiras retiradas
Tras a popularización do 'Z' e os avisos das autoridades, a empresa de seguros Zúric retirou o seu logo -un 'Z' branco sobre un fondo azul- para evitar calquera interpretación posíbel de apoio explícito a Rusia.
A compañía explicou que están a retirar o símbolo que a representa "de forma temporal" nas súas redes sociais, onde aparece sen contexto e que podería levar a malentendidos".
Significado do 'Z'
O 'Z', unha letra que non pertence ao alfabeto cirílico, apareceu por primeira vez nos vehículos militares rusos durante a invasión de Ucraína.
Segundo o profesor da Universidade da Cidade de Dublín Donnacha Ó Beacháin, o 'Z' podería ser unha abreviatura da frase "pola vitoria". Se ben hai quen defende que podería significar oeste.
O significado concreto do signo é descoñecido, pero xa está presente nos coches, roupa ou redes sociais como mostra de apoio ás tropas rusas.
Tras a iniciativa de Baviera e a Baixa Sajonia, outros estados federais como Berlín, Sajonia-Anhalt e Baden-Württemberg tamén se pronunciaron a favor de tipificar o seu uso como delito.
