Unha vez máis PSOE, PP e Vox sumaron os seus votos na Mesa do Congreso español para vetar que na Cámara se crease unha comisión de investigación sobre Juan Carlos I.
Desta volta, exerceu o veto despois de que o Tribunal Supremo tivese que abrir unha investigación polas denuncias sobre comisións ilegais pagadas por Arabia Saudita polo AVE á Meca e que figuran en contas atribuídas ao rei emérito español.
A decisión tomouse despois de que os letrados e letradas do Congreso xa se pronunciasen contra a creación dunha comisión. A inviolabilidade protexe Juan Carlos, argumentan, porque se ben os feitos son posteriores, derivan da súa etapa como rei español.
As peticións de comisións de investigación foron rexistradas por BNG, ERC, JxCat, CUP, Compromís, PNV, EH Bildu e Máis País; así como Unidas Podemos.
PSOE, PP e Vox renunciaron a crear estas comisións anteriormente, pero esta é a primeira vez que refutaron despois de que a Fiscalía decidise abrir unha investigación.
A Fiscalía suíza iniciou en marzo pasado unha investigación para determinar se existen vínculos entre as viaxes de Juan Carlos I a Arabia Saudita, Kuwait e Baréin e as transferencias a contas bancarias ligadas a el e a súa amiga Corinna zu Sayn-Wittgenstein.
As cábalas da Fiscalía apuntaban que tanto o rei emérito como a súa amiga terían recibido diñeiro de monarquías persas.
