INTERNACIONAL

[VÍDEO] Estas son as primeiras imaxes do buraco negro da Vía Láctea

Ciencia

[VÍDEO] Estas son as primeiras imaxes do buraco negro da Vía Láctea

Científicos de todo o mundo reunidos no proxecto colaborativo EHT veñen de revelar as primeiras fotografías do corazón da nosa galaxia.
Primeira imaxe de Saxitario A, o buraco negro da Vía Láctea. (Foto: EHT Collaboration)
photo_camera Primeira imaxe de Saxitario A, o buraco negro da Vía Láctea. (Foto: EHT)

Astrónomos de todo o mundo veñen de revelar, a través do proxecto Event Horizon Telescope (EHT) Collaboration, a primeira imaxe do buraco negro supermasivo no centro de nosa propia galaxia, a Vía Láctea, utilizando observacións dunha rede mundial de radiotelescopios. Este resultado proporciona unha evidencia abafadora de que o obxecto é de feito un buraco negro e lanza pistas valiosas sobre o funcionamento destes xigantes, que se cre que residen no centro da maioría das galaxias.

Os científicos viran previamente estrelas orbitando arredor de algo invisíbel, compacto e moi masivo no centro da Vía Láctea. Isto suxire fortemente que este obxecto, coñecido como Saxitario A (Sgr A), é un buraco negro, e a imaxe que se vén de difundir proporciona a primeira evidencia visual directa diso.

Malia que non podemos ver o buraco negro en si, porque está completamente escuro, o gas brillante que o rodea revela unha firma reveladora: unha rexión central escura —chamada "sombra"— arrodeada por unha estrutura similar a un anel brillante. A nova vista captura a luz desviada pola poderosa gravidade do buraco negro, que é catro millóns de veces máis masivo que o noso Sol.

Coincide coas predicións de Einstein

"Sorprendeunos o ben que o tamaño do anel coincidía coas predicións da Teoría da Relatividade Xeral de Albert Einstein", dixo nun comunicado Geoffrey Bower, científico do proxecto EHT natural de Taiwán. "Estas observacións sen precedentes —asegurou— melloraron enormemente a nosa comprensión do que sucede no centro da nosa galaxia e ofrecen novos coñecementos sobre como estes buracos negros xigantes interactúan coa súa contorna".

Os resultados do equipo EHT publícanse nunha edición especial de The Astrophysical Journal Letters. Debido a que o buraco negro está a uns 27.000 anos luz da Terra, é imperceptíbel ao ollo humano. Para obter unha imaxe, o equipo creou o poderoso EHT, que uniu oito observatorios de radio existentes en todo o planeta para formar un só telescopio virtual "do tamaño da Terra".

O EHT observou Sgr A ao longo de varias noites, recompilando datos durante moitas horas seguidas, de forma similar ao uso dun tempo de exposición prolongado nunha cámara de fotos. Após o lanzamento da colaboración EHT en 2019 obtívose a primeira imaxe dun buraco negro, chamado M87, no centro da galaxia Messier 87, máis distante.

Así se tomaron as primeiras imaxes de Sgr A. (Fotos: EHT)
Así se tomaron as primeiras imaxes de Sgr A. (Fotos: EHT)

Os dous buracos negros son notabelmente similares, a pesar de que o buraco negro da nosa galaxia é máis de mil veces máis pequeno e menos masivo que M87. "Temos dous tipos completamente diferentes de galaxias e dúas masas de buracos negros moi diferentes, pero perto do bordo destes buracos negros son incribelmente similares", defendeu Sera Markoff, copresidenta do Consello de Ciencias de EHT e profesora de Astrofísica na Universidade de Ámsterdam (Países Baixos).

"Isto dinos que a Relatividade Xeral goberna estes obxectos de perto, e calquera diferenza que vexamos máis lonxe debe deberse a diferenzas no material que arrodea os buracos negros", sostivo.

Apoia Nós Diario

Se estás lendo de balde este xornal é grazas ás máis de 3.000 persoas subscritoras. A información independente ten un prezo. Apoia un xornalismo galego e sustentábel subscribíndote a Nós Diario ou facéndote mecenas.

Máis en INTERNACIONAL
comentarios