Esta cuarta feira filtrouse que a Fiscalía do Tribunal Supremo está perto de arquivar as investigacións en contra do rei emérito español Juan Carlos I por suborno, lavado de capitais, delito contra a facenda pública e tráfico de influencias.
Todo isto a pesar das dúas regularizacións fiscais fóra da lei e das evidencias que investigacións como a da Fiscalía suíza están sacando á luz.
Onte, os principais medios españois abriron as súas edicións avanzando que Juan Carlos I pretende volver ao Estado español en breve, e que tomará unha decisión unha vez que o Ministerio Fiscal faga público o decreto no que resolva abandonar as indagacións, o que se agarda que aconteza nas vindeiras semanas.
Tamén matizan que sería unha visita e que o seu obxectivo é non danar a imaxe como xefe de Estado do seu fillo, Felipe VI, polo que chegan a adiantar que seleccionará Portugal como lugar de residencia nun futuro.
Cabeceiras como El Mundo ou ABC dedicáronlle incluso un editorial, no que responsabilizan o Goberno estatal encabezado por Pedro Sánchez de forzar a súa fuxida cara aos Emiratos Árabes Unidos.
Ao tempo, tamén transcendeu a publicación de O meu rei caído, da francesa Laurence Debray, no que reitera a súa intención de regresar, acusando “os amigos que lle deron as costas. Incluso aqueles que lle deben a riqueza e a fama”, apunta a obra.
Sen recoñecer ningún dos delitos polos que está sendo investigado, gaba o ditador Francisco Franco, que o elixiu para sucedelo, salientando que lle deixou “unha clase media. Sen ela, non tería podido levar a cabo a transición”.
Ao ser cuestionada a respecto da volta, a voceira do Executivo estatal e ministra de Política Territorial, Isabel Rodríguez, limitouse a sinalar que é un tema "individual" do rei emérito.
