O Programa Mundial de Alimentos da ONU (PMA) recibiu o Premio Nobel da Paz de 2020 polos seus esforzos en combater a fame, a súa contribución para mellorar as condicións de paz en áreas afectadas por conflitos, e por actuar como motor dos esforzos para previr o uso da fame como arma de guerra e conflito".
Así, o Comité Noruegués do Nobel, que entrega cada ano este galardón dun millón de euros, recoñeceu o traballo dunha organización da ONU, pero non a que encabezaba todas as apostas, a Organización Mundial da Saúde (OMS) polo seu liderado na crise sanitaria da Covid-19.
A presidenta do Comité, Berit Reiss-Andersen, con todo, vinculou esta decisión, en parte, ao coronavirus, asegurando que a pandemia contribuíu a "un forte aumento do número de vítimas da fame no mundo".
Aínda que subliñou que o PMA fose un gañador digno do Nobel da Paz independentemente da crise sanitaria, admitiu que a pandemia reforzou "as razóns" para darlle o premio. "Até que non exista unha vacina médica, os alimentos son a mellor vacina contra o caos", aseverou, citando a propia PMA.
Sinalou que en países como Iemen, Congo, Nixeria, Sudán do Sur e Burkina Faso, a combinación dun conflito violento e a pandemia "provocou un aumento espectacular do número de persoas que viven ao bordo da inanición".
"Fronte á pandemia, o Programa Mundial de Alimentos demostrou unha capacidade impresionante para intensificar os seus esforzos", engadiu.
