Os xornais portugueses fanse eco nesta quinta feira do crecente risco de erupción volcánica na illa de São Jorge, no arquipélago dos Açores.
Segundo recolle Público, o presidente Goberno dos Açores, José Manuel Bolieiro, deu orde de artellar un dispositivo de evacuación da illa. "Temos tudo preparado. O Serviço Regional de Protecçao Civil, o Civisa [Centro de Informação e Vigilância Sismo-Vulcânica]... Temos todas as forças preparadas", dixo.
O Civisa, informa Jornal de Notícias, notificou "vários sismos sentidos pela população" nos últimos días; perto de 2.000, segundo as autoridades. "Desde as 22 horas do dia 22 de março até às 10 horas [hora local] de dia 23 de março foram sentidos 20 sismos", sostén nun comunicado.
Os terremotos, até o de agora, tiveron unha magnitude baixa na escala de Richter, que oscilou entre 1,6 e 2,7 —isto é, foron "micro" ou "moi pequenos" sismos—, mais foron percibidos con "intensidade máxima" de entre 3 e 4, segundo a escala de Mercalli —hai até doce categorías—.
Mais non só preocupan os sismos ás autoridades lusas. Esta cuarta feira o Civisa alertaba dun risco de nivel 4 —de cinco posíbeis— de que se produza en São Jorge unha erupción volcánica; isto é, unha "posibilidade real".
No caso de se producir esa catástrofe natural, as autoridades están preparadas para lanzar unha alerta de evacuación a través "da rádio local, das redes sociais das entidades competentes e também através dos sinos das igrejas".
En consecuencia, o Goberno insta as persoas "com maiores vulnerabilidades" da principal zona afectada da illa, o municipio das Velas, que abandonen as súas casas.
