Os 5 escanos do PNV respaldarán o proxecto de orzamentos do PP, mais non será precisamente debalde. Antes de Aitor Esteban anunciar en conferencia de imprensa o apoio da formación soberanista ás contas do goberno Rajoy, o conselleiro de Economia de Ajuria Enea, Pedro Azpiazu, anunciou un acordo con Madrid sobre o contencioso do cupo. Euskadi consegue a devolución de 1.400 millóns de euros (demandaba 1.600 millóns) que, de acordo co executivo de Urkullu, pagou de máis durante o período 2007-2014 en conceito de cupo (o diñeiro que a Administración vasca transfire ao Estado para o pagamento dos servizos que empresta a Administación central, ben como para cobrir as competencias non transferidas e a alicota parte da débeda pública española que lle corresponde abonar ás e aos contribuíntes vascos).
Non só se produce unha devolución dunha cantidade tan cuantiosa, senón que ademais fica estabelecido o cupo para os próximos cinco anos en 956 millóns de euros, 540 millóns menos que a cantidade correspondente a 2016 (no anteproxecto que enviou Montoro ao congreso o montante por este conceito ascendía a 1.200 millóns de euros).
"É un acordo excelente", avaliou Pedro Azpiazu. Como obterá Euskadi a devolución dos 1.400 millóns de euros? Pois en anualidades sucesivas a descontar do cupo nos próximos exercicios: en 2017, a quita será de 10 por cento, en 2018 de 15 por cento, en 2019 de 20 por cento, en 2020 de 25 e en 2021 de 30.
Mais o acordo vai alén de fechar o contencioso sobre o cupo nun sentido tan positivo para a facenda vasca. O PNV logra tamén unha rebaixa da tarifa eléctrica para a industria de Euskadi, "un aspecto que beneficia toda as empresas", dixo Esteban, sen precisar máis o contido desta medida. Tamén hai acordo sobre o cronograma completo do coñecido como o Y vasco, conexións ferroviarias cos aeroportos, ben como tamén o nihil obstat para que Ajuria Enea poda realizar novas convocatorias de persoal que permitan repor os postos de traballo amortizados na Ertzaintza.
