Son o gas natural e a nuclear enerxías 'verdes'? Velaquí a proposta da Unión Europea

A Eurocámara apoia a iniciativa da Comisión Europea de incluír estas dúas fontes enerxéticas no marco da estratexia contra o cambio climático, polo que, de forma transitoria, apoiará os investimentos privados nos próximos anos.
Central nuclear de Ascó, en Tarragona. (Foto: Europa Press)
photo_camera Central nuclear de Ascó, en Tarragona. (Foto: Europa Press)

O pleno do Parlamento europeo deu o visto bo esta cuarta feira á proposta da Comisión Europea de incluír actividades específicas de gas natural e enerxía nuclear, "baixo certas condicións", na súa listaxe de actividades económicas "ambientalmente sostíbeis".

Pasarán a ser consideradas, deste modo, enerxías 'verdes', entendendo Bruxelas que o investimento privado nestas actividades "ten un papel na transición ecolóxica", se ben esta consideración ten un límite de tempo e requisitos específicos.

E obterán a cualificación de tecnoloxías "de transición", isto é, aquelas que non poden ser substituídas aínda por outras fontes enerxéticas baixas en emisións e cunha maior sustentabilidade.

Os proxectos nucleares serán considerados 'verdes' até 2045; os de gas, até 2030

No caso da enerxía nuclear, só se considerarán 'verdes' os proxectos que se aproben antes de 2045, mentres o prazo para o gas remataría en menos dunha década, en concreto no ano 2030.

Na sesión votouse unha resolución que instaba a rexeitar esta proposta, debido á oposición recente en dúas comisións parlamentarias —de Medio Ambiente e Economía—, que avogaron por tombala cun voto negativo conxunto.

Mais, finalmente, foron máis as e os eurodeputados (328) que se pronunciaron cos seus votos en contra desa resolución —e, polo tanto, a prol da medida promovida pola Comisión Europea— que os que a apoiaron (278). Houbo, aliás, 33 abstencións.

Porén, após esta votación a proposta non adquire aínda a condición de lei en firme, pois sería rexeitada no caso de que, cando menos, 20 dos 27 estados membro da Unión Europea decidisen oporse, algo que se antolla pouco probábel.

Comentarios