mércores 15.07.2020

O Parlamento europeo aproba a cesión de dados de persoas que viaxen en avión, con fins 'antiterroristas'

As compañías deberán remitir aos Estados membros nome, dirección, confesión relixiosa, comida, teléfono, información das tarxetas de crédito, axencia de viaxes, equipaxe e mesmo número de asento da pasaxe. 

Controis de pasaporte nos aeroportos internacionais [Imaxe Parlamento europeo]
Controis de pasaporte nos aeroportos internacionais [Imaxe Parlamento europeo]

A norma, proposta pola Comisión europea, chegou ao Parlamento en 2011 mais a Eurocámara bloqueou a súa aprobación en diversas ocasións en boa medida pola falta de garantías dos dereitos individuais das persoas que viaxan en avión. Porén, a alarma 'terrorista' deu empurre á votación que saíu adiante por ampla maioría, no concreto 461 apoios, 179 votos en contra e 9 abstencións

As compañías aéreas deberán informar da confesión relixiosa que profesa a pasaxe

A norma, coñecida polas súas siglas en inglés (PNR ou Rexistro de Nomes da Pasaxe) prevé a creación de 28 rexistros nacionais, un por cada estado, ao que as compañías aéreas deberán remitir nome, dirección, teléfono, información das tarxetas de crédito, axencia de viaxes, equipaxe e mesmo número de asento da pasaxe. En total, 19 dados daquelas persoas que collan un avión con destino a un país extracomunitario ou procedente deste. 

Esta información, aliás, poderá ser partillada entre os territorios e requerida por uns e outros no marco de investigacións, din, 'antiterroristas'.

Sorprende que entre a "información sensíbel" que solicitarán á pasaxe se inclúe a confesión relixiosa e mesmo a comida que elixa no voo, un elemento central a respeito da cultura musulmá ao non se alimentar de porco. 

comentarios