Representantes de 14 organizacións palestinas asinaron esta quinta feira en Alxer (Alxeria) un documento "de reconciliación", bautizado como Declaración de Alxer, que ten por obxectivo dar pulo á "unidade nacional" e "rematar coa división" na política palestina.
O documento foi asinado en presenza do presidente alxerino, Abdelmadjid Tebboune, impulsor da iniciativa, e participaron, entre outras entidades, Hamás e Fatah. Parte da "firme convicción" de que a situación actual que atravesa o movemento palestino "favorece o statu quo e alimenta o fracaso do proceso de paz en Oriente Medio".
Esta declaración integra nove puntos para lograr esa "reconciliación" entre as diferentes sensibilidades. O primeiro deles busca "permitir que todos [os organismos asinantes] se adhiran á Organización para a Liberación de Palestina (OLP), único representante lexítimo do pobo palestino". Fatah é o principal activo desta organización, na que, porén, non están integrados Hamás nin a Xihad Islámica.
Outra das metas reflectidas neste documento é a convocatoria de eleccións presidenciais e lexislativas no prazo dun ano en Gaza, actualmente dirixida por Hamás; Cisxordania, gobernada por Fatah, e Xerusalén Leste, controlado hoxe polo Estado israelí.
O acordo chegou após dúas xornadas de negociacións e é froito do encontro, o pasado 5 de setembro, entre o presidente alxerino Tebboune e o seu homólogo na Autoridade Palestina, Mahmoud Abbas. Previamente, en xullo, reuníranse tamén con Ismail Haniyeh, de Hamás.
Porén, a declaración non agrada por completo todas as formacións representadas. Esta mesma sexta feira, unha das asinantes, a Fronte Democrática para a Liberación de Palestina (FDLP) acusou Hamás e Fatah de eliminar do texto a cláusula que recollía a constitución dun Goberno "de unidade nacional" en Palestina.
O obxectivo deste Executivo nacente sería "reunificar" as institucións palestinas e "adoptar unha estratexia combativa para apoiar a resistencia do pobo palestino fronte á ocupación israelí e a súa violencia".
