O argumento da Xunta Eleitoral de Gipuzkoa é que existe unha sentenza firme da Audiencia Nacional que indica que Otegi non ten dereito ao sufraxio pasivo (isto é, a ser votado) até 2021.
Por súa parte, a liña de defensa de Íñigo Irún, o avogado de Otegi, é que na sentenza da AN non se especificaba a que comicios non se podía apresentar o líder da esquerda abertzale. EH Bildu entende, a maiores, que Otegi xa cumpriu a pena accesoria de inhabilitación para o sufraxio pasivo -isto é, para ser elexíbel- durante os seus anos en prisión. Otegi abandonou a cadea o pasado 1 de marzo.
A esquerda abertzale ten agora dous días para apresentar alegacións a este fallo da Xunta Eleitoral de Gipuzkoa.
Todo indica que o asunto acabará sendo dilucidado polo Tribunal Constitucional.