A OTAN trata de sumar en Múnic máis países para apoiar Kíiv

Representantes de arredor de 100 Estados, incluídas 40 xefas e xefes de Goberno, desprazáronse a sexta feira a Alemaña, onde se inaugurou a 59º edición da Conferencia de Seguridade de Múnic, un foro de política exterior e de seguridade con “estreitos vínculos financeiros e políticos co Goberno alemán”, explica Deutsche Welle. No encontro participarán até o domingo delegacións dos Estados Unidos (EUA) ou a China, así como os líderes de Francia, Emmanuel Macron, Reino Unido, Rishi Sunak, a propia Alemaña, Olaf Scholz, a Comisión Europea, Ursula von der Leyen, ou a Organización do Tratado do Atlántico Norte (OTAN), Jens Stoltenberg. Por primeira vez en 20 anos non foi convidada Rusia, que xa declinara asistir en 2022. Nesta ocasión a guerra en Ucraína está a centrar boa parte dos debates nas reunións, nas que Berlín “seguirá intentando convencer” a máis países para enviar armamento a Ucraína, sinalou o ministro de Defensa alemán, Boris Pistorius, en declaracións recollidas por Euronews. Así e todo, a case un ano da invasión rusa, a meirande parte dos países do mundo non se uniron a este chamamento. Os datos do Kiel Institute revelan que apenas 32 Estados enviaron armas a Ucraína, fóra da OTAN -ou países candidatos- só o fixeron Australia, Nova Zelandia, o Xapón e Corea do Sur. Algo semellante acontece coas sancións unilaterais, aplicadas por 46 Estados, ningún de Suramérica ou África por exemplo. Precisamente isto levou a programar varios debates sobre o denominado “sur global” cun obxectivo claro, “abordar o resentimento que senten os países de África, América Latina e Asia cara á orde internacional [liderada polos Estados Unidos], que non sempre serviu aos seus intereses”, para "gañarnos os indecisos", indica o informe marco elaborado polo presidente do cumio, Christoph Heusgen. Aínda que Pistorius incidiu no evento como un foro para o entendemento, onde se adoita tratar a resolución de crises en múltiples reunións bilaterais, os medios públicos alemáns definen a Conferencia como defensora “dos fundamentos liberais dun mundo liderado por Occidente” e “da visión do mundo do presidente estadounidense Joe Biden”. Máis armamento Na apertura, interveu por videoconferencia o presidente ucraíno, Volodimir Zelenski, que amais de incidir en que “non hai alternativa á vitoria de Ucraína”, volveu reclamar que se aceleren o máximo posíbel as entregas de armas por parte da OTAN, despois de facerse público que a primeira entrega de tanques será de aproximadamente a metade dos comprometidos nesta fase. A ese respecto, Scholz instou os membros da alianza militar interesados en enviar tanques a “facelo agora”, após recibir múltiples presións en primeira instancia por parte doutros países para aceptar a reexportación de tanques alemáns, un dos máis utilizados polos Exércitos europeos. Nese sentido, criticou as promesas feitas por varios países que non se traduciron en realidades, apunta o Frankfurter Allgemeine Zeitung. A súa petición foi recollida por Macron, que repetiu que a necesidade de “intensificar” os envíos de armas responde a que permitirían unha contraofensiva de Kíiv que precedería ao comezo de “negociacións críbeis”. Desde a invasión rusa até o 20 de novembro de 2022, Ucraína recibiu da OTAN e dos seus aliados máis de 100.000 millóns de euros, deles case 40.000 millóns correspondentes a armamento. No que atinxe a estes envíos, a voceira do Ministerio de Asuntos Exteriores ruso, Maria Zajarova, afirmou que “os países da OTAN están xogando á inocencia, tratando de demostrar que non son parte do conflito”, porén, salientou a Tass que a “súa implicación é máxima, con actividade provocativa durante moitos anos, e agora controlan directamente o liderado do réxime de Kíiv”. Tamén incidiu nos intereses da industria das armas, e subliñou que "o gran capital occidental está detrás do bombeo ao Exército ucraíno". Aumenta a compra de armas aos EUA Con relación a esta cuestión e poucos días despois de que Stoltenberg recoñecera que os arsenais dos membros da OTAN estaban “esgotados” polo volume de asistencia militar enviada a Ucraína, que gasta varias veces o nivel de munición que a alianza militar é capaz de producir, “as armas estadounidenses están na parte superior da lista da compra” da UE, ratifica Reuters. Ademais de que países como Polonia, Finlandia ou Alemaña están a negociar contratos para producir armas dos EUA, a “demanda en Europa” deste armamento estase a disparar, apunta, debullando que nos pedidos abunda a artillería ou drons en comparación a unidades de máis valor como tanques ou avións. En paralelo, a posibilidade de impulsar conversas de paz para acabar coa guerra en Ucraína sigue moi lonxe, con Moscova acusando Washington de ordenar a Kíiv rachar co suposto acordo de paz asinado despois da invasión, polo que entende que é cos EUA con quen ten que negociar. Á vez, Biden atribúe a Ucraína a responsabilidade das negociacións, mentres Zelenski exixe a retirada rusa até de Crimea para iniciar o proceso e Rusia ínstao a aceptar o seu control territorial con ese mesmo fin. Máis aló da iniciativa de Belarús, aliado ruso, para acoller conversas entre Biden e o seu homólogo ruso, Vladimir Putin, tampouco están a ter eco as peticións de países como México, a China ou a India para estabelecer un proceso de paz. A pesar de que Ucraína “depende das armas occidentais”, corrobora AP, no seo da OTAN tampouco se perciben indicios de que a alianza militar vaia impulsar o proceso, como amosa a rápida reacción de Biden para desacreditar os membros do seu partido por pedir que se tivesen en conta as solucións diplomáticas ou o veto no Parlamento da Unión Europea a engadir ás resolucións condenatorias contra Rusia propostas para negociar a paz. O Exército ucraíno retrocede no Donbás Nas últimas semanas as tropas rusas avanzaron no Donbás, premendo especialmente na contorna de Bakhmut, que se atopa practicamente cercado, o que levou o Goberno ucraíno a ordenar a evacuación inmediata dos civís. Xa convertida nunha guerra de desgaste, a OTAN advertiu que se trata dunha fase crítica do conflito e sostivo que Moscova xa puxo en marcha unha nova ofensiva. Aínda así, medios especializados sinalan que de producirse está en fase de preparación, pois apuntan que aínda non hai suficientes probas de acumulación de unidades.