A ONU apoia, aínda que nun segundo plano, a apertura dun proceso de negociación entre o Goberno do Estado español e Catalunya.
Así o deixou ver na sexta feira o secretario xeral do organismo, António Guterres, que compareceu con Pedro Sánchez após unha reunión. Desta forma tan simple amosou ese respaldo ao diálogo en Catalunya fronte á oposición do bloque político de dereitas.
Se ben Guterres non quixo facer alusións directas ao proceso, pero despois de ser preguntado ao respecto reflexionou: “Non é propio comentar cuestións de política interna para un secretario xeral. Pero, en termos xerais, hai un principio global”.
“Todos os problemas teñen que solucionarse coa política. O diálogo é un instrumento fundamental”, continuou.
Aliás, para falar do procés, dos indultos e do futuro de Catalunya hai que fornecer “condicións” para esa conversa na que se acheguen puntos de vista.
“A creación de condicións para que o diálogo poida frutificar é sempre algo moi importante nas nosas sociedades”, insistiu o representante da ONU.
Na mesma comparecencia, Sánchez descartou de forma rotunda -polo menos, por agora- un referendo de autodeterminación, sexa vinculante ou non, ou calquera tipo de consulta cidadá que sexa “divisiva”.