“Que quede claro que calquera instalación ou aspectos da ocupación británica dentro dos Seis Condados (baixo control británico, dos nove con que conta a provincia do Ulster) -xa sexa na fronteira ou noutro sitio-, calquera infraestrutura será un obxectivo lexítimo de ataque e de accións armadas, contra esa infraestrutura e contra as persoas que a xestionen”. Nunha entrevista emitida en exclusiva pola canle de TV británica Channel 4, un encapuchado identificado como portavoz do Novo IRA lanzou esta ameaza en referencia ao acordo para o Brexit entre a UE e o Reino Unido.
O acordo prevé que a lexislación europea se aplique no Norte de Irlanda (a provincia actualmente baixo control británico do Ulster) durante os catro primeiros anos tras a saída do Reino Unido da Unión -unha das eivas que os unionistas do DUP ven para dar o apoio a Boris Johnson-. Transcorrido ese tempo, sempre que o Parlamento desa rexión así o decida, haberá a posibilidade de estabelecer de novo fronteiras entre Irlanda do Norte e o resto da illa.
“É importante entender que este é un país baixo ocupación británica, e ao igual que en calquera outra situación colonial a xente ten o dereito de responder por todos os medios que fagan falla a esa ocupación”, engadiu o entrevistado, que ao respecto das preguntas do xornalista sobre a posibilidade da creación dunha fronteira en en Irlanda, sinalou: “Non existe tal fronteira irlandesa. É unha fronteira británica”.