Partidos nacionalistas e independentistas e formacións da esquerda de ámbito estatal acordaron unir forzas no Congreso para encontrar fórmulas efectivas que permitan abrir unha investigación sobre a fortuna do rei emérito Juan Carlos I e sobre as demais noticias publicadas nos últimos días sobre a Casa Real, segundo anunciou Gabriel Rufián tras conversar cos portavoces das citadas formacións.
O portavoz de ERC no Congreso informou aos medios de comunicación que durante as últimas horas mantivera conversas cos portavoces de JxCat, CUP, Unidas Podemos, EH Bildu, PNV, Más País e BNG. Neste sentido, o deputado e voceiro parlamentario da formación nacionalista galega en Madrid, Néstor Rego, informou de que se sumaría á proposta para que non se bloquee a comisión de investigación, xa que entende que o comunicado da Casa Real confirma as informacións aparecidas "dunha extrema gravidade".
O Borbón reinante recoñece implicitamente que o pai é corrupto para tentar evitar que se demostre que el tamén o é. Se quere renunciar á herdanza, que renuncie á sucesoria. Non hai pandemia que oculte o mar de lama dos Borbóns. #República #RepúblicaGalegahttps://t.co/lHkvcJk5YN
— Néstor Rego (@NestorRego) March 15, 2020
O domingo, tras coñecer o comunicado de Felipe VI no que anunciaba que renuncia a toda herdanza que lle puidese deixar o seu pai e que retiraba ao rei emérito a asignación oficial que viña recibindo até o de agora, Rufián xa anunciara que tiña previsto pórse en contacto co resto de partidos do Congreso para coordinar as súas actuacións e lograr que se poña fin á "impunidade" que, ao seu xuízo, veu gozando o anterior xefe do Estado.
"Sucesora do franquismo"
Nun comunicado difundido aos medios, Rufián sinala que "o anuncio de Felipe de Borbón é unha confesión en toda regra e unha total emenda á Coroa", mais non é suficiente. "Non basta coa renuncia individual á herdanza. Hai que investigar a orixe do diñeiro, os negocios e obviamente depurar a responsabilidade até as últimas consecuencias", defende Rufián.
Es una confesión en toda regla.
— Gabriel Rufián (@gabrielrufian) March 15, 2020
Nos pondremos en contacto esta misma noche con el resto de grupos parlamentarios para activar todos los mecanismos de investigación a nuestro alcance con el mayor consenso y fuerza posible.
Ya basta de impunidad.https://t.co/RZ8L4zUU3k
Neste contexto, fixo un chamamento aos partidos que se definen como constitucionalistas: "Nunca antes se presentara unha oportunidade para que o autochamado constitucionalismo demostre o de que todos somos iguais ante a lei". Ademais, denunciou que a monarquía española "bebe do legado franquista e da inmunidade que isto lle proporciona".
"A Coroa é a institución designada como sucesora do franquismo. É unha institución opaca, invulnerábel e inviolábel ante a xustiza, algo que rompe o principio constitucional de igualdade dos cidadáns", subliñou Rufián.
O PSOE oponse
A iniciativa chega unha semana despois de que a Mesa da Cámara, seguindo o criterio dos letrados, tombase unha comisión de investigación grazas ao PSOE, que votou canda o PP e Vox.
Tras coñecer as decisións adoptadas este domingo polo rei Felipe VI, desde o PSOE avanzaron que non pensan cambiar de criterio nesta cuestión, na que sempre apoiaron as recomendacións dos servizos xurídicos do Congreso.