Contundente vitoria nas eleccións corsas das candidaturas propias, até tal punto que a representación das forzas francesas limítase a 17 deputados do total de 63 que compoñen a Asemblea de Córsega.
A segunda volta dos comicios deixa unha Asemblea con maioría absoluta da lista liderada polo presidente corso saínte, Gilles Simeoni, que logra 32 deputados e deputadas após apañar máis de 40% dos votos. ‘Fa populu Inseme’ presentábase como unha candidatura cidadá, valedora do autonomismo corso e o autogoberno polo que aposta Simeoni.
En segundo lugar, o actual alcalde de Ajaccio, Laurent Marcangeli, que á fronte dunha lista de dereitas (Un Soffiu Novu) compactou a fronte pro-Francia da política da illa, mais só acadou o 32,02% dos apoios nas urnas.
As forzas propias desta illa, que Francia se anexionou cara a finais do século XVIII fanse con aproximadamente o 70% da representación
‘Avanzemu’, liderada polo alcalde de Porto Vecchio, Jean- Christophe Angelini, obtivo 15% dos votos e 8 deputados e deputadas na Asemblea. Esta candidatura unía a esquerda nacionalista do PNC e a independentista Corsica Libera, mais os resultados son máis baixos do agardado. Ambas as dúas forzas sumaban 23 representantes na anteruior lexislatura.
A lista independentista Core in Fronte que tanto na primeira como na segunda volta presentouse en solitario co seu líder Paul-Felix Benedetti obtivo o 12,26% dos votos, e terá 6 deputados e deputadas.
Así pois, as forzas propias desta illa, que Francia se anexionou cara a finais do século XVIII, e cunha extensión menor que a provincia de Lugo e poucos máis habitantes (320.000) que Vigo, fanse con aproximadamente o 70% da representación.
