As autoridades ucraínas veñen de informar da morte de cando menos 18 persoas após estrelarse na mañá desta cuarta feira un helicóptero contra un edificio, próximo a unha gardaría, na cidade de Brovary (rexión de Kíiv). Entre as vítimas están dúas crianzas e varios altos cargos do Ministerio do Interior, segundo trasladou o xefe da Policía Nacional, Ígor Klymenko.
#Brovary. It is impossible to believe. 17 dead, including 2 children. The Minister of Internal Affairs, the First Deputy Minister and the Secretary of State died. My deepest condolences😞
— Kira Rudik (@kiraincongress) January 18, 2023
📹 Brovary's auditor pic.twitter.com/djAU1v3ya6
O propio ministro responsábel desta carteira, Denis Monastirski, así como o seu viceministro, Evgueni Yenin, e o secretario de Estado de Interior, Yuriy Lubkovich. A aeronave na que circulaban, pertencente ao servizo estatal de emerxencias, caeu sobre o edificio contra as 9 horas [hora da Galiza].
"No momento da traxedia, crianzas e traballadores da institución estaban na gardaría. Todo o mundo foi evacuado", precisou o gobernador da rexión, Oleksiy Kuleba, após ter coñecemento do sucedido.
Desde Kíiv manteñen abertas todas as hipóteses: "Investigadores e expertos están a traballar agora no lugar da traxedia. Están a levarse a cabo medidas de instrución de carácter urxente. Neste momento estamos a considerar todas as versións posíbeis do accidente de helicóptero. A instrución sumarial foi confiada aos investigadores do SBU [os servizos secretos do interior]", dixo o fiscal xeral, Andrei Kostin, en declaracións recollidas por Unian.
O presidente do Consello Europeo, Charles Michel, lamentou a morte do ministro ucraíno: "Unímonos a Ucraína na dor polo tráxico accidente en Brovary. O ministro Denis Monastirski era un grande amigo da Unión Europea", manifestou.
Esta mesma cuarta feira, a primeira hora, o ex primeiro ministro belga defendera o envío de máis armamento a este país: "O momento é agora: Necesitan urxentemente máis equipamentos e estou persoalmente a favor de fornecer tanques a Ucraína".
