venres 29.05.2020
Nos últimos anos implicárase na resolución do conflito vasco

Morre Kofi Annan, ex secretario xeral da ONU

O ex secretario xeral das Nacións Unidas Kofi Annan morreu este sábado en Suíza. O diplomático ganés dirixira a ONU entre 1997 e 2006 e no 2001 foi distinguido co premio Nobel da Paz “por revitalizar o organismo, por lle dar prioridade aos dereitos humanos” e pola súa oposición ao “terrorismo internacional” e o seu compromiso na loita contra a sida en África.

Kofi Annan, ex secretario xeral da ONU, en 2012. Foto: cedida.
Kofi Annan, ex secretario xeral da ONU, en 2012. Foto: cedida.

Annan nacera en Kumasi, Ghana, en 1938. Formouse academicamente no seu país natal e con menos de 30 anos comezou a traballar en organismos internacionais relacionados coas Nacións Unidas. Na década dos 70 tamén participou dos gobernos de Ghana.

Como secretario xeral da ONU -sucedeu ao exipcio Boutros-Ghali despois de que Estados Unidos vetase o seu segundo mandato-, impulsou a reforma da institución. Liderou algunha das campañas de máis sona -a medio camiño entre a propaganda e os efectos realis-, como a dos Obxectivos do Milenio.

Cando Estados Unidos, co apoio do Goberno británico de Tony Blair e do español de José María Aznar, se botou á invasión de Iraq -baseada nunha infame campaña de mentiras-, Annan instouno a non o facer sen autorización das Nacións Unidas. En 2004 declarou que a acción dos Estados Unidos era “ilegal”.

Nos últimos anos implicouse na resolución de conflitos, entre eles o do País Vasco. En 2011 amosouse “esperanzado ante a fin do último conflito armado de Europa” durante a súa participación na conferencia de paz do Palacio de Aiete de Donosti.

comentarios