venres 03/12/21

Moderna, segunda vacina en recibir luz verde de Bruxelas

A Comisión autoriza a súa comercialización tres horas despois de a Axencia Europa do Medicamento (EMA, nas siglas en inglés) publicar unha recomendación favorábel ao seu uso.
EuropaPress_3505552_05_january_2021_us_rock_island_moderna_covid-19_vaccine_vile_is_pictured_at
Frasco co remedio de Moderna, fotografado nos Estados Unidos (Foto: Jack Kurtz / ZUMA Wire)

A Comisión Europea autorizou hoxe a comercialización da vacina de Moderna contra a Covid-19, tres horas despois de a Axencia Europa do Medicamento (EMA, nas siglas en inglés) publicar unha recomendación favorábel ao seu uso.

Así o anunciou a presidenta da Comisión Europea, Ursula von der Leyen, nunha mensaxe nas redes sociais. "Estamos a prover aos europeos de vacinas seguras e efectivas contra a Covid-19. Autorizamos a vacina de Moderna, a segunda que se usará na UE", manifestou.

O pasado mes de decembro o Executivo comunitario tamén autorizou o uso da vacina de Pfizer/BioNTech tan só horas despois de recibir o visto bo da EMA. Habitualmente este proceso leva uns 67 días. Coa autorización da vacina de Moderna aumentará o número de doses con que contarán os Estados membros, nun momento en que os atrasos e problemas na distribución das doses suscitou as críticas dalgúns Gobernos.

En virtude dos contratos asinados coa farmacéutica estadounidense, a Comisión Europea adquiriu 80 millóns de doses da vacina de Moderna, con opción a 80 millóns máis.

A comisaria de Saúde, Stella Kyriakides, indicou que outras seguirán á de Pfizer e Moderna. "Os nosos esforzos non cesarán até que as vacinas estean dispoñíbeis para todos na UE", sinalou, recomendando que mentres dure a campaña de inoculación convén ter paciencia, disciplina e manterse vixiantes. E en palabras do director executivo da EMA, Emer Cooke, a vacina de Moderna supón "outra ferramenta para superar a urxencia actual".

ARNm e 95% efectiva

A vacina mRNA-1273 da compañía estadounidense Moderna  está baseada, como a de Pfizer/BioNTech, no mecanismo do ARN mensaxeiro. Nos ensaios clínicos demostrou unha efectividade para previr a enfermidade de arredor de 95%.

A información galega está na túa man!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

Non se rexistraron efectos secundarios graves durante as diferentes fases de probas. As persoas participantes toleraron ben a vacina, de acordo aos expertos da compañía e aos independentes. Si que houbo reaccións adversas moderadas, habituais na administración de vacinas, mais non foron duradeiras.

A mRNA-1273 está aprobada na UE para maiores de 18 anos e adminístrase en dúas inxeccións, con 28 días de diferenza.

Moderna, segunda vacina en recibir luz verde de Bruxelas
comentarios