INTERNACIONAL

Miles protagonizan un Aberri Eguna expansivo polo dereito a decidir de Euskal Herria

Publicidade 195144
INTERNACIONAL

Miles protagonizan un Aberri Eguna expansivo polo dereito a decidir de Euskal Herria

Prazas de 128 concellos de toda Euskal Herria acolleron a celebración dun Aberri Eguna expansivo que tivo Iruñea como punto central. Nos actos, que foron convocados por Euskal Herria Batera, reivindicouse un país “con capacidade decisión e plenitude de dereitos políticos, para ofrecer dignidade e garantías a todas as persoas". Mentres, o PNV realizou un acto en Bilbo en que se reivindicou como forza abertzale e chamou a completar “por fin” o Estatuto, logrando todas as competencias, como antesala da consecución dun novo status para que as e os vascos decidan o seu futuro.

Euskal Herria acolleu 128 mobilizacións polo Aberri Eguna 2021. Na imaxe, o acto desenvolvido no concello de Arrasate (Foto: Sortu)
photo_camera Euskal Herria acolleu 128 mobilizacións polo Aberri Eguna 2021. Na imaxe, o acto desenvolvido no concello de Arrasate (Foto: Sortu)
A. Mera
04/abr./21 - 18:25 Actualizado: 05/abr./21 - 22:05

Miles de persoas celebraron este domingo 4 de abril o Aberri Eguna, o Día da Patria Vasca, realizando actos expansivos en até 128 concellos de Euskal Herria.

Publicidade 194503

A convocatoria partiu da plataforma Euskal Herria Batera, baixo o lema 'Keinu bat batera' ('Un xesto en común'), e estivo apoiada por EH Bildu, Podemos Ahal- Dugu e os sindicatos ELA e LAB, entre outras organizacións.

O acto central foi na praza do Castelo de Iruñea, que acolleu máis de 600 persoas para reivindicar unha Euskal Herria "con capacidade de decisión e plenitude de dereitos políticos".

Publicidade 195634

A mobilización de Iruñea comezou ás 12 horas e, mantendo a distancia de seguridade, rodeouse o quiosque da praza do Castelo, en que se colocaron as bandeiras de Nafarroa e a Ikurriña, ademais da bandeira da Galiza, de Irlanda, Escocia, Córsega, Gales, Palestina ou Catalunya.

Ás 12.30 horas deu comezo por megafonía unha retransmisión en directo, que tamén se puido seguir por internet, na que se emitiron as cancións 'Txoria txori', 'Gernikako  Arbola' e 'Ikusi mendizaleak', para que as e os asistentes ás 128 mobilizacións que se realizaron ao longo de Euskal Herria puidesen cantalas á vez. Mentres tanto, no acto de Iruñea, un artista elaborou nun lenzo un grafiti coa palabra 'Independentzia'.

Publicidade 195255

Tras as cancións, Irune Urra e Carlos Etxapare, en representación de Euskal Herria Batera, leron unha declaración en que resaltaron que, a pesar das "condicións excepcionais" nas que se celebra un ano máis o Aberri Eguna, marcado pola pandemia, "a proposta do noso grupo mobilizouse miles de persoas en toda Euskal Herria para expresar que nos sentimos parte dunha comunidade e que desexamos fortalecer ese sentimento".

Un feito que "confirma a análise final que faciamos o ano pasado", subliñaron. Neste sentido, destacaron que "no mundo está en auxe o comunitarismo para facer fronte aos riscos da globalización; os territorios, e as comunidades que se consolidan sobre eles convértense na ferramenta máis eficaz para garantir ás persoas unha vida digna e a igualdade de dereitos". Así, expresaron o seu desexo de que "Euskal  Herria sexa unha desas comunidades, con capacidade de decisión e plenitude de dereitos políticos, para ofrecer dignidade e garantías a todas as persoas".

Publicidade 195720

"En diante, Euskal Herria necesita que fagamos país para promover a converxencia, para compactar unha comunidade que sexa a base dos proxectos políticos de futuro". "Facer país sempre sobre a base do debate democrático, con dinámicas de confrontación cando sexa necesario e dinámicas de colaboración sempre que sexa posíbel; desa forma lograremos que a cidadanía, os axentes sociais e as institucións compaxinen os seus esforzos na mesma dirección e sentido", remarcaron.

Respecto diso, avogaron por "manter esta dinámica conxunta no Aberri Eguna e propor cada ano un xesto simultáneo”, como o deste 2021, “para que calquera persoa en Euskal Herria se sinta protagonista dun empeño colectivo", á vez que apostaron por "ampliar o foco e analizar como se pode complementar o xesto dun día coa tarefa diaria de facer país, que alianzas e referencias hai que construír para consolidar unha dinámica que nos leve a identificar símbolos, himnos e accións comúns a toda Euskal Herria“.

Publicidade 195536

A mobilización de Euskal Herria Batera recibiu apoios desde distintas nacións como a galega, na que o deputado do Bloque Nacionalista Galego (BNG) no Congreso, Néstor Rego, ou a representante do BNG en Europa, Ana Miranda, enviaron mensaxes en Twitter de parabenización e apoio ás vascas e vascos na loita pola soberanía e a xustiza social, así como o presidente da Fundación Galiza Sempre, Rubén Cela.

Ortuzar chama a completar o Estatuto como antesala dun novo status para que as os vascos decidan o seu futuro

O presidente do Euzkadi Buru Batzarra do Partido Nacionalista Vasco (PNV), Andoni Ortuzar, defendeu no acto de celebración do Aberri Eguna organizado polo seu partido no Palacio Euskalduna de Bilbo, que hai que completar “por fin" o Estatuto de Gernika e debe ser a antesala para conseguir un novo status de autogoberno que traia un novo pacto político que permita "decidir o futuro actual e o das próximas xeracións".

O acto celebrouse no marco dunha reunión ordinaria da Asemblea Nacional jeltzale, á que asistiron, entre outros, o Lehendakari Iñigo Urkullu, a presidenta do Parlamento Vasco, Bakartxo Tejeria, o presidente do Parlamento navarro, Unai Hualde, así como deputados, alcaldesas e rexedores.

No seu discurso, Ortuzar destacou que se viven "tempos emocionais, pasionais, montados nunha montaña rusa", na que conviven a preocupación pola cuarta onda da pandemia e as súas consecuencias na saúde e economía, a expectación por cando chegan as vacinas e cando nos tocará a cada un, coas ganas de saír e socializar, de recuperar a vida".

Ortuzar sinalou que está "en xogo o futuro do país" e hai que expor solucións "agora mesmo". “Esperanza e convicción”, pediu transmitir. “Si, falamos de esperanza porque cremos na forza e a capacidade de resiliencia deste pobo. E tamén porque estamos convencidos de que o autogoberno vasco vai ser capaz de dar as respostas necesarias, as mellores respostas, aos problemas que temos. Sentimos con forza, ilusión e ideas para saír adiante", engadiu.

No seu discurso,  Ortuzar indicou tamén que son un partido abertzale que entende a construción nacional como "un proceso gradual", que se fai "con pasos medidos pero firmes", que pon "primeiro sólidos cimentos sobre os que levantar a casa común para vascos".

O líder jeltzale insistiu en que a "resposta máis eficaz" ás necesidades existentes virá da man de "maior autogoberno, de maior soberanía, de poder decidir aquí sobre os problemas e os proxectos de aquí".

"De ser suxeitos activos de nosa propia vida como Pobo. É por iso que completar por fin o Estatuto de  Gernika -e xa é hora-, lograr para Euskadi todas as súas competencias, é un primeiro paso, ao que deben seguir os traballos para conseguir un novo Status de autogoberno que traia ao noso país un novo pacto político para decidir o noso futuro actual e o das próximas xeracións", sinalou.

No seu discurso aludiu á  ikurriña que presidía o acto, "pequena, decolorada, pero símbolo de que non hai situación difícil da que non se poida saír". Esa ikurriña segundo explicou, repousou, en 1903, sobre o féretro de Sabino Arana, e, despois, 75 anos máis tarde, en 1978, acompañou tamén a Juan de Ajuriagerra no seu funeral.

Ortuzar engadiu que lle gustaría que servise tamén para despedir coa "máxima honra e agarimo" a quen faleceu pola pandemia, para quen pediu un forte aplauso.

O presidente do EBB sinalou que tamén quixo traer esa ikurriña ao acto deste domingo para significar que "nos momentos tan especialmente complicados como os que viñeron cando morreron Sabino Arana e Juan de Ajuriagerra, houbo mans abertzales, houbo mans vascas, que colleron esta ikurriña, que colleron a testemuña e souberon levar á nación até onde está hoxe".

"Tamén entón había ameazas populistas, autoritarias, pero aquelas mans vascas souberon colocar a ikurriña no bando correcto, no da democracia e o humanismo, facendo da persoa o eixo para construír a nación vasca. Hoxe esta ikurriña e todo o que simboliza está nas nosas mans. É a testemuña xeracional que nos esixe estar á altura destas complicadas circunstancias e ímolo a facer", asegurou.

Ortuzar afirmou que afrontan este momento decisivo con esperanza, aínda que haxa "nubes negras sobre a cabeza", porque cren na "forza e fortaleza" de Euskadi". "Sentímonos fortes para avanzar con ilusión. Queremos presentar a este país un bo proxecto para deixar atrás os últimos meses duros, para superar todas as consecuencias sociais e económicas, agregou.

Neste sentido, sinalou que o autogoberno e a súa iniciativa serán os que  dean solucións para resolver os problemas e, por iso, se o obxectivo do PNV foi consolidar e consolidar cada vez máis o autogoberno, hoxe ese desexo "é máis necesario que nunca". "Si ao autogoberno vasco, á soberanía, a traballar nós mesmos o noso futuro, si a unha Euskadi libre", concluíu.

Etiqueta
Euskal Herria EH Bildu PNV Euskadi
Máis en INTERNACIONAL
Comentarios