Continúa a escalada represiva. O Goberno español xa fala directamente de sedición. Esta sexta feira, a Fiscalía apresentou unha denuncia pola presunta comisión deste delito contra unha vintena de persoas que terían obstaculizado, na madrugada da cuarta feira 20 de setembro, a saída de efectivos da Garda Civil da sede da Consellaría de Economía. O Ministerio Público apunta como hipotéticos inductores dos presuntos tumultos os líderes das entidades soberanistas Jordi Sànchez e Jordi Cuixart, presidentes da Assemblea Nacional Catalana e da Òmnium Cultural, respectivamente.
O delito de sedición é aquel en que se incorre cando as persoas se alzan "publica e tumultuariamente" para impedir pola forza a aplicación da lei ou o desenvolvimento das funcións que lle son propias ás autoridades ou aos funcionarios públicos.
O emprego do adxectivo "tumultuarias" por parte do portavoz do goberno español, Méndez de Vigo, para se referir ás manifestacións aponta a que o Estado ten en mente a imputación por este delito non só aos particulares que tomaron parte nas concentracións, senón tamén aos responsábeis políticos.
Xa a Garda Civil dixo ter visto indicios de sedición no comportamento dos altos cargos detidos na macro-operación desenvolvida a cuarta feira pola súa participación nos preparativos do referendo de autodeterminación.
Até aquel momento os cargos que se imputaban ás e aos políticos independentistas eran os de prevaricación, desobediencia e malversación de fondos públicos. A sedición é máis grave pois pode envolver penas de prisión, para aquelas persoas "constituídas en autoridade" (segundo reza o artigo 544 do Código Penal), de entre 10 e 15 anos.