Élisabeth Borne, primeira ministra do Executivo francés que preside Emmanuel Macron, enviou unha proposta ás forzas sindicais que enfrontan hai tres meses a reforma das pensións, que eleva de 62 a 64 anos a idade de xubilación, para dialogar no comezo da vindeira semana, comunicaron a cuarta feira medios internacionais, un día despois de que máis de dous millóns de persoas, informou a Confederación Xeral do Traballo, saíran á rúa na décima xornada de mobilización xeral para exixir a retirada do proxecto.
Unha vez finalizadas as manifestacións producíronse enfrontamentos entre participantes nas marchas e a Policía, que remataron con 201 persoas detidas e 175 policías feridos, sostivo o Ministerio do Interior, entre denuncias pola forte represión, da que alertaron entidades como a Organización das Nacións Unidas ou Amnistía Internacional.
Estas demandas estanse a multiplicar nas últimas xornadas, como a difusión dun arquivo de son no que membros da Policía humillan e ameazan un mozo procedente do Chad, amais de golpealo. Asemade, a Fiscalía francesa asegurou que abriu unha investigación pola represión das forzas de seguridade contra unha mobilización ecoloxista a fin de semana após a denuncia da familia dun manifestante que se atopa en coma.
Pola súa parte, a resposta gobernamental foi trasladar que estudan prohibir a entidade Levantamentos da Terra, que convocou a mobilización, acusándoa de “accións violentas” e chamar á “insurrección”.
Hai 48 horas, o Executivo rexeitou unha proposición dos sindicatos para instaurar unha mediación entre as partes que permitise avanzar no diálogo, e que foi aceptada por MoDem, unha das formacións que apoia o Goberno de Macron.
Incluso se a xuntanza entre Goberno e sindicatos se chega a producir, as posicións están moi afastadas, pois o mandatario reiterou que non retirará ou modificará a reforma das pensións, que acabou aprobando sen o voto do lexislativo. Ao tempo, a maioría da poboación francesa, inciden os traballos demoscópicos, e as forzas sindicais reclaman a retirada do texto. Aliás, xa foi convocada a quinta feira da vindeira semana a undécima xornada de mobilización xeral no país.
Consello Constitucional
Arredor das distintas apelacións á norma, o Consello Constitucional francés subliñou que o 14 de abril emitirá o seu ditame sobre a legalidade da reforma das pensións e o método empregado polo Executivo para a súa tramitación e posterior aprobación, que incluirá unha decisión sobre a proposta de referendo presentada polas formacións progresistas.