A batalla da opinión pública estana gañando sen problemas os coletes amarelos. 70 por cento das francesas e franceses simpatizan co movimento popular, en tanto que só 18 por cento aproba a xestión de Emmanuel Macron.
A resposta do Eliseo a esta disonancia coa sensibilidade media da sociedade francesa concretizouse esta segunda feira co anuncio dun incremento do salario mínimo (aínda que algunhas fontes, citadas por Público.pt, afirman que non é un aumento con carácter universal, senón un subsidio para determinadas situacións familiares) e un pacote de desgravacións fiscais para as rendas máis baixas, coa exención tamén de tributación para as horas extras.
A factura, por volta de 10.000 millóns de euros. A consecuencia, o incremento en seis décimas do déficit público previsto, que pasaría de 2,8 a 3,4 por cento, por riba do admisíbel para Bruxelas.
Non demorou en entrar en xogo o vice-primeiro ministro italiano e dirixente dos 5 Estrelas, Luigi Di Maio, quen chamou a Comisión Europea a actuar con Francia tal e como fixo con Italia (ao devolver unhas contas cun déficit de 2,4 por cento). Bruxelas, dixo, "tamén debería abrir un proceso contra Francia, se é que as regras se aplican a todos".
E que farán os coletes amarelos?
A cuestión agora radica en saber se o movimento de Macron vai ser suficiente para desactivar o levantamento popular, cuxa manifestación máis masiva concluíu o pasado sábado coa detención de por volta de 1.700 persoas.
Non parece nada seguro que o Eliseo vaia conseguir tan facilmente os seus obxectivos. Para comezar, hai convocados novos protestos para este sábado en París e non poucos elementos entre os coletes xa non se conforman con conquistas económicas e poñen no albo a cabeza política do propio xefe de estado.
