A eliminación física do fiscal Nisman -o día antes de comparecer no Congreso, após denunciar a presidenta da Arxentina por supostamente encobrir os terroristas responsábeis do atentado de 1994 que matou 85 persoas da comunidade xudea de Bos Aires- sería un elo dunha operación de ar golpista dirixida a desestabilizar o país e a desprazar do goberno a líder peronista (a escasos once meses das eleccións presidenciais de decembro).
Esa é a tese que sostén a Casa Rosada desde que a opinión pública recebeu conmocionada a noticia da morte en estrañas e violentas circunstancias do fiscal Alberto Nisman.
No entorno político e mediático de Kirchner mantense que Nisman era un pión de Antonio Stiusso, chefe de operacións da SIDE (Secretaría de Intelixencia) a quen a presidenta de Arxentina purgou en decembro pasado. Stiusso sería, para entendernos, o home de Washington e Tel Aviv nos sumidoiros da espionaxe arxentina.
Agora, Cristina Fernández Kirchner dá un paso máis e decide liquidar a SIDE para criar ex novo unha Axencia Federal de Intelixencia. A líder peronista convocou o Congreso a unha sesión extraordinaria para, xa o 1 de febreiro, aprobar o proxecto de modificación da Lei Nacional de Intelixencia que posibilite estas mudanzas.
Así pois, recrúa a guerra aberta entre sectores da intelixencia vinculados aos EUA e Kirchner. Hai moitos pontos escuros aínda por esclarecer. Antonio Stiusso continúa libre e sen cargos. As próximas horas poden ser decisivas para a resolución dun caso que xa a está a condicionar, e veremos en que sentido, as perspectivas eleitorais de decembro.
