Kiliçdaroglu e Erdogan mediranse en segunda volta

As eleccións do domingo non aclararon o panorama político de Turquía. Após un reconto no que dominaron as acusacións cruzadas de xogo sucio entre Goberno e oposición, ningún dos catro candidatos que optaban á Presidencia do Estado alcanzou o 50% necesario para declararse vencedor na primeira volta electoral. Desta maneira, o presidente de Turquía, Recep Tayyip Erdogan, e o opositor Kemal Kiliçdaroglu protagonizarán o 28 de maio unha segunda volta das eleccións presidenciais, segundo confirmou esta segunda feira o Consello Electoral Supremo (YSK). O organismo detallou que Erdogan logrou 49,51% dos votos, mentres que Kiliçdaroglu –respaldado por unha coalición formada por seis partidos e apoiado polo prokurdo Partido Democrático dos Pobos (HDP)– fíxose con 44,89% das papeletas. En terceiro lugar, e polo tanto eliminado para a segunda volta, ficou o candidato da Alianza Ancestral, Sinan Ogan, que obtivo 5,17% dos respaldos, segundo recolleu a axencia estatal turca de noticias, Anatolia. A comisión electoral sinalou, ademais, que participou nos comicios 89% da poboación turca con dereito a voto. Erdogan, o político turco que máis tempo estivo á fronte da política do Estado –perto de 20 anos entre o seu desempeño como primeiro ministro e despois como presidente–, busca un terceiro mandato entre denuncias da oposición sobre a inconstitucionalidade da decisión. Kiliçdaroglu, líder do Partido Republicano do Pobo (CHP), aspira a sacar do poder o presidente grazas ao apoio de varios partidos e ao crecente descontento polo aumento da represión social e a crise económica, afondada pola alta inflación. Ademais, os terremotos de febreiro, que deixaron máis de 50.000 persoas falecidas, danaron a imaxe de Erdogan, ao descubrirse que permitira sucesivas amnistías de edificios que non cumprían coas normativas sobre sismos. Así e todo, o actual presidente de Turquía partirá con vantaxe na segunda volta, ao presentarse como opción natural para ese 5% de votantes que o pasado domingo depositou nas urnas a papeleta do candidato ultradereitista Ogan, cuxo principal lema de campaña foi a expulsión das refuxiadas e refuxiados que acolle Turquía. Ademais deste 5% que non optou por ningún dos dous candidatos principais, tamén 0,5% de votantes escolleron o domingo o populista de centroesquerda Muharrem Ince como opción preferida, a pesar de retirarse da contenda electoral tres días antes, pois o seu nome figurou igualmente nas papeletas. Finlandia entra hoxe na OTAN entre o temor da comunidade kurda no país Acusacións de obstrución Os resultados tardaron en chegar. Ahmet Yener, presidente da Comisión Electoral Central, explicaba pouco antes das 23 horas do domingo que, até esa hora, só se computara no seu sistema a metade dos votos. Segundo analistas internacionais, este atraso deberíase a que os interventores do Partido da Xustiza e o Desenvolvemento (AKP) de Erdogan terían obxectado todas as urnas onde gañara Kiliçdaroglu. Os votos destas mesas electorais non se puideron incluír no sistema até que as obxeccións foron resoltas. Os reparos do partido de Erdogan propiciaron acusacións por parte do CHP, sinalando intentos obstrucionistas por parte do AKP. Ao longo da noite do domingo, Kiliçdaroglu acusou Erdogan de tentar manipular os resultados pondo diferentes trabas. "Non bloqueen a vontade desta nación. Fago un chamado aos nosos traballadores da democracia sobre o terreo. Non saian nunca das urnas e xuntas electorais. Estamos aquí até que se conte cada voto", dixo. Ademais, segundo denunciou a Confederación Intersindical, o activista asturiano Tino Brugos, desprazado até a cidade turca de Siirt para seguir a xornada electoral en calidade de observador internacional, foi "retido pola Policía", pretendendo, aseguraron, obstaculizar o seu labor. Primeira segunda volta para Turquía Os resultados nas votacións presidenciais levan agora a dúas semanas de campaña electoral até o 28 de maio, onde se decidirá o futuro presidente do Estado turco. Será a primeira vez que Turquía organice unha segunda volta das urnas, pois a elección popular do presidente turco só tivo lugar en dúas ocasións máis: en 2014 e en 2018, sendo vencedor en ambas Erdogan na primeira ronda con 52% de votos. Eleccións lexislativas En paralelo, decorreron este domingo as eleccións lexislativas para escoller 600 representantes das 81 provincias para a Grande Asemblea Nacional, a Cámara baixa turca. A este respecto, os resultados preliminares prevén que a alianza entre o islamista AKP de Erdogan, o MHP da extrema dereita e varias formacións de tendencia fundamentalista manterán a maioría no Parlamento turco. A formación centroesquerdista CHP, que lidera Kiliçdaroglu, e o Partido da Esquerda Verde (YSP), no que se integraban as candidaturas do prokurdo HDP, conseguiron uns resultados peores do que agardaban. Ambas as formacións obtiveron perto dunha decena de deputados menos cada unha respecto ao que prevían as sondaxes. Con todo, CHP logrou o seu mellor resultado en porcentaxe e en escanos nos últimos anos, (169), mentres que o YSP, con 8,8% dos votos, ficou após este domingo con 60 escanos, cinco menos que os alcanzados hai cinco anos. Pola súa parte, o AKP de Erdogan conseguiu unha cómoda maioría no Parlamento con 267 escanos, xunto co seu aliado, o ultradereitista Partido de Acción Nacionalista (MHP) de Devlet Bahçeli –con 51 asentos– e coa súa escisión de hai seis anos, o Partido Bo (IYI Parti) de Meral Aksener –con 45 escanos–. Turquía vota cun Erdogan máis lonxe que nunca do poder O conflito Kurdo, na cerna dos comicios Sinan Ogan. (Foto: Europa Press / Contacto / Abdurrahman Antakyali) Sinan Ogan, candidato da Alianza Ancestral á Presidencia de Turquía, asegurou que manterá "consultas" para determinar a que candidato apoiará na segunda volta das eleccións presidenciais que decorrerá o 28 de maio, entre o actual mandatario Recep Tayyip Erdogan, e o líder da opositor Kemal Kiliçdaroglu. Ogan recalcou que unicamente respaldaría Kiliçdaroglu se este non fai concesións ao prokurdo Partido Democrático dos Pobos (HDP). O conflito do pobo kurdo sitúase, así, no foco da escolla do próximo presidente de Turquía.