O Partido Demócrata presentou onte a solicitude formal de apertura de xuízo político ou impeachment contra o presidente estadounidense, Donald Trump, por un único artigo de "incitación á insurrección" despois do seu apoio ás mobilizacións que culminaron co asalto ao Capitolio no 6 de xaneiro.
Os prazos impedirían destituílo antes do 20 de xaneiro, día da toma de posesión de Joe Biden, mais si permitirían inhabilitalo para exercer cargos públicos e volverse presentar como candidato nunha eleccións.
Os membros demócratas da Cámara de Representantes David Cicilline, Ted Lieu e Jamie Raskin subscriben a solicitude de apertura do proceso de destitución contra Trump por "incitar premeditadamente á violencia contra o Goberno dos Estados Unidos". A moción para a tramitación de urxencia da solicitude foi recorrida polos republicanos, mais o proceso de xuízo político contra Trump está xa formalmente aberto.
O texto presentado sostén que Donald Trump repetiu afirmacións falsas sobre a súa suposta vitoria nos comicios presidenciais do 3 de novembro, arengou os seus seguidores nun discurso retransmitido o propio 6 de xaneiro e presionou o secretario de Estado de Georgia para mudar o resultado electoral.
"Con todo iso, o presidente Trump puxo en grave perigo a seguridade de Estados Unidos e as súas institucións de Goberno", sinala a resolución, á que tivo acceso anticipado a cadea CNN.
25ª emenda
Ademais, entre hoxe e mañá está previsto que a Comisión do Regulamento da Cámara de Representantes se reúna para estabelecer un marco de debate sobre a posíbel activación da 25ª emenda da Constitución. Neste caso, son o vicepresidente e os membros do Goberno os que iniciarían o proceso de destitución.
