Ciclo "Mirando ao Mundo"

O IGADI aborda o “presente e futuro das esquerdas en América Latina”

Realizará unha conferencia a cargo do ex embaixador de Nicaragua no Estado español, Augusto Zamora, esta sexta feira 25 de novembro, ás 20h na Casa da Luz (Praza da  Verdura) en Pontevedra.

americalatina

Para poñer o ramo á edición 2016 ciclo de conferencias “Mirando ao Mundo”, o Instituto Galego de Análise e Documentación Internacional (IGADI) en parecería co Concello de Pontevedra, organiza unha palestra intitulada “Presente e futuro das esquerdas en América Latina”, que terá lugar esta sexta feira na cidade do Lerez. A conferencia será impartida por  Augusto Zamora, ex embaixador da República de Nicaragua no Estado español. 

Zamora, que para alén de diplomático de ampla traxectoria é analista e investigador en política internacional con experiencia no ámbito académico, analizará o actual contexto continental debullando a situación dos movementos de esquerda e dos gobernos progresistas. A nova onda de gobernos da dereita, após o impeachment contra Dilma  Roussef no Brasil, as vitorias electorais conservadoras en Arxentina e no Perú, a situación de Bolivia e Ecuador, a crise venezolana, o proceso de paz en Colombia e o novo contexto para Cuba, serán os aspectos sob os que palestrará o membro numerario da Academia de Xeografía e Historia de Nicaragua, que tamén exerceu de profesor de Dereito Internacional Público e de Relacións Internacionais na Universidade Autónoma de Madrid (UAM). Tamén avaliará as expectativas rexionais logo da vitoria de Donald Trump nas eleccións presidenciais norteamericanas.

A conferencia decorrerá a partir das 20h na Casa da Luz, na praza da Verdura de Pontevedra.

A INFORMACIÓN GALEGA ESTÁ NA TÚA MAN!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

comentarios