O Iemen é o país que corre un maior risco de sufrir unha catástrofe humanitaria en 2021, segundo alertou o Comité Internacional de Rescate (IRC, nas siglas en inglés). É o terceiro ano consecutivo que o Estado árabe se sitúa no alto desta sombría lista de dez países. IRC é unha ONG fundada por Albert Einstein en 1933 co fin de se opor ás políticas raciais de Adolf Hitler. A súa finalidade é axudar as persoas perseguidas por motivos étnicos, políticos ou relixiosos.
O conflito bélico continuado, o avance da fame e o colapso da axuda humanitaria ameazan con empeorar dramaticamente a situación en 2021, sinalou onte IRC. A todo isto sumouse nas últimas horas un novo surto da praga de lagostas do deserto.
En declaracións a Al Jazeera, Tamuna Sabadze, director de axuda humanitaria da ONG, sinalou que era necesario "maior compromiso do que vemos hoxe" por parte dos actores internos, rexionais e globais na procura da fin do conflito.
"24 millóns de persoas teñen algún tipo de necesidade humanitaria ─sexa alimentos, protección, servizos sanitarios ou educación─", sinalou.
A directora executiva de Unicef alertaba hai uns días: "Máis de 80% da poboación require axuda humanitaria urxente e protección. Incluídos 12 millóns de nenas e nenos, cuxas vidas son un pesadelo andante."
Lista de 10 + 10 países
A lista de IRC para 2021, ordenados do primeiro ao último polo risco, é: Iemen, Afganistán, Siria, República Democrática do Congo, Etiopía, Burkina Faso, Sudán do Sur, Nixeria, Venezuela e Moçambique.
Outros dez países foron incluídos, mais sen ordenar por termos de gravidade: Camerún; República Centroafricana, Chad, Colombia, Líbano, Malí, Níxer, Palestina, Somalia e Sudán.