A guerra de Israel en Cisxordania

Mentres o brutal asalto israelí sobre Gaza cumpre xa dez meses nos que deixou 40.000 mortos e unha enorme crise humanitaria, Israel acelera a colonización de Cisxordania cun aumento dos asaltos militares, cunha política de desposesión e confiscación de terra palestina e coa expansión dos asentamentos. En Cisxordania, onde viven 3 millóns de palestinos sometidos ao Goberno militar israelí, produciuse nos últimos anos un notábel incremento dos asaltos do exército israelí e ataques dos colonos, intensificados coa volta de Benjamin Netanyahu ao poder en decembro de 2022 ao mando do Goberno máis extremista da historia de Israel. Mais desde o comezo da guerra en Gaza, Cisxordania padece a peor onda de violencia en décadas, un estado de guerra non declarada onde os palestinos son vítimas día tras día dun baño de sangue sen precedentes no marco dunha total impunidade. Desde outubro, 600 palestinos foron asasinados polo exército israelí ou os colonos, máis que en calquera outro período rexistrado, por 24 israelís en Cisxordania e Israel. Amais, produciuse un grande incremento dos ataques dos colonos, tanto no número (1.150) como na intensidade, que xa viñan en aumento nos últimos anos e case sempre baixo a protección do exército israelí. Así mesmo, neste período rexistrouse unha repunta no número de detencións en Cisxordania (10.000), situando o número de presos palestinos en cárceres israelís en 9.300, case o dobre que o 1 de outubro, dos cales 3.450 sen cargos. Por outra banda, as autoridades israelís aprobaron recentemente a maior apropiación de terra en Cisxordania (12.7 km²) desde os Acordos de Oslo en 1993. Neste 2024, Israel apropiouse de 23,7 km² de territorio palestino, máis que nos últimos 20 anos xuntos. Nin terra nin casa As demolicións tamén aumentaron significativamente. 1.247 estruturas palestinas foron demolidas ou confiscadas en Cisxordania e Xerusalén Leste, das cales 39% eran casas habitadas, e 2.836 persoas foron desprazadas. Amais, as restricións de movemento aumentaron cun incremento dos postos de control militares e cos colonos estabelecendo os seus propios controis de estrada, o que multiplica as dificultades dos palestinos para traballar ou ver as súas familias. Nada impediu que os israelís construísen asentamentos ilegais en terra roubada e que os colonos israelís ataquen os palestinos Cisxordania vén sendo obxecto dun lento proceso de absorción, acelerado desde a chegada de Netanyahu ao goberno. Smotrich e Ben-Gvir, colonos e ministros de extrema dereita dos que depende Netanyahu, non ocultan o seu desexo de incrementar os asentamentos israelís nos territorios ocupados, ilegais baixo a lei internacional, e inundar Cisxordania con novos colonos como pasos cara á total anexión do territorio. O Likud de Netanyahu tamén prometeu avanzar na construción de asentamentos en Cisxordania. A administración da ocupación en Cisxordania está nas mans de Smotrich, ministro de finanzas israelí que supervisa a planificación dos asentamentos, quen impulsou unha grande escalada na expansión dos mesmos, en violación do dereito internacional. Entre novembro de 2022 e outubro de 2023, Israel aprobou a construción de 24.000 vivendas en Cisxordania e 9.000 máis neste 2024 mentres continúan legalizándose postos de avanzada como asentamentos. Amais, Smotrich viu aumentar recentemente as súas competencias en materia de asentamentos, o que fará máis doada a expansión dos mesmos, mentres aplicará unha política aínda máis dura en relación con calquera construción palestina. Ocupación ilegal Israel ocupou Cisxordania, Gaza e Xerusalén Leste en 1967. De acordo coa lei internacional, e confirmado polo Tribunal Supremo israelí en 2005, a potencia ocupante non pode desprazar os seus cidadáns ao territorio ocupado, mais nada impediu que os israelís construísen asentamentos ilegais en terra roubada e que os colonos israelís ataquen os palestinos para obrigalos a abandonar a súa terra. Os asentamentos e postos de avanzada israelís en Cisxordania e Xerusalén Leste, onde viven 700.000 colonos xudeus coa cidadanía israelí, son un grande obstáculo para calquera acordo de paz cos palestinos e para a viabilidade dun futuro estado palestino. O Tribunal Internacional de Xustiza vén de declarar que a ocupación israelí dos territorios ocupados é ilegal e que ten a obriga de rematar o seu control tan axiña como sexa posíbel. Mais Israel avanza noutra dirección, co parlamento aprobando unha resolución opoñéndose á solución dos dous estados –declaración oficial da morte dos Acordos de Oslo– e camiñando cara a anexión de Cisxordania, como xa fixo con Xerusalén Leste e os Altos do Golán, a expensas da súa propia seguridade e da paz na rexión.