Os ministros de Asuntos Exteriores da UE realizaron esta segunda feira unha cimeira para analisar os últimos desenvolvimentos da crise desatada en Ucraína.
A UE recoñece a lexitimidade do novo goberno de Kiev, embora as forzas que lle dan suporte non respeitaron no seu momento o acordo alcanzado polo presidente deposto Ianukovich coa oposición ucraína, pacto en teoría amparado por Bruxelas.
En declaracións á imprensa española desprazada en Bruxelas para cubrir a cimeira dos chefes dos Asuntos Exteriores da UE, o chanceler español, José Manuel García-Margallo, puxo a énfase en defender que a Constitución ucraína consagra o país como un Estado "íntegro e indivisíbel", un termo co que evocaba a indivisibilidade da nación española prescrita pola Constitución de 1978.
García Margallo exixiu asemade a "retirada das forzas rusas" de Crimea, ao tempo que resaltou que cómpre substituír a dinámica do confronto entre a UE e Rusia pola lóxica da "cooperación".
A UE vai realizar unha cimeira de xefes de goberno esta quinta feira sobre a crise en Ucraína, sen que sobre a mesa estea en principio a resposta militar
Este encontro de ministros de Asuntos Exteriores precede a unha cimeira da UE ao máis alto nível, cos xefes de goberno e eventualmente de Estado, a realizar a vindeira quinta feira.
A UE advertiu hoxe a Moscova sobre a hipótese de lle impor sancións de non retirar as súas tropas de Crimea. A resposta militar á crise non está sobre a mesa, e esta mesma segunda feira foi desbotada polo ministro de Asuntos Exteriores do Reino Unido, William Hague.
Esta terza feira está previsto que chegue a Kiev o secretario de Estado dos EUA, John Kerry.
Esta tarde, Moscova negou que o seu mando militar en Crimea teña dado un ultimatum ás tropas ucraínas destacadas nesa república autónoma para nas próximas horas se renderen ante as forzas pro-rusas.
