A visita de Nancy Pelosi a Taiwan segue a avivar as tensións entre os EUA e a China. A presidenta da Cámara de Representantes estadounidense aterrou esta terza feira na capital, Taipéi, na que foi a primeira visita dun alto cargo da Casa Branca á illa desde 1997.
Pelosi optou deste modo por facer caso omiso das advertencias do Goberno chinés, que asegurou que respondería con "medidas contundentes" no caso de producirse finalmente a visita.
"A nosa visita reitera que os Estados Unidos están con Taiwan, unha democracia robusta e vibrante e un importante socio no Indo-Pacífico.", dixo a presidenta da Cámara após pisar solo taiwanés.
Esta cuarta feira o ministro de Exteriores da China, Wang Yi, volveu afear a despregadura diplomática estadounidense na illa: "Quen xogan con lume non acabarán ben, e os que ofendan á China deberán ser castigados".
Na mesma liña, Wang acusou os EUA de "violar a soberanía da China baixo o disfrace da democracia" e instou Washington a "non soñar con obstruír a reunificación do país".
"A completa reunificación da China é a tendencia dos tempos e algo inevitábel na historia. Non cederemos espazo ás forzas a prol da independencia de Taiwan e a interferencia externa", apuntou, subliñando que "Taiwan é parte da China".
"A visita de Pelosi foi perigosa e estúpida", dixo o ministro chinés Wang Yi
Aliás, o ministro cualificou de "perigosa e estúpida", así como "farsa", a visita de Pelosi. "O principio de 'Unha soa China' tornou na norma básica que rexe as relacións internacionais e nunha parte integral da orde internacional após a Segunda Guerra Mundial".
En consecuencia, Wang Yi pediu ao Goberno de Joe Biden que "deixe de xogar a carta de Taiwan para alterar a rexión Asia-Pacífico" e "cese inmediatamente na violación dos propósitos e principios da Carta das Nacións Unidas".
