O presidente dos EUA, Donald Trump, asegurou na quinta feira pola noite ─madrugada galega de onte─ que baixo o seu mandato o país "rexurdirá máis forte" tras derrotar o coronavirus e acusou o candidato demócrata, Joe Biden de se renderse á pandemia e á China.
Fíxoo no discurso que fechou a última Convención Nacional Republicana, ante a atenta mirada de máis de mil persoas congregadas no xardín principal da Casa Branca. Trump comezou o discurso lembrando as seis vítimas do furacán Laura ao seu paso por Lousiana, así como o irmán del, Robert, recentemente falecido.
O parlamento, tras ser presentado pola filla del Ivanka, seguiu a aceptación oficial da súa candidatura ás eleccións do próximo 3 de novembro.
Como xa fixo o vicepresidente, Mike Pence, na noite anterior, Trump condenou "nos términos máis enérxicos" os últimos actos de violencia que se produciron en varias cidades dos Estados Unidos durante as protestas polas mortes de cidadáns negros a mans de axentes da Policía brancos. Insistiu en que os disturbios se producen cidades "dirixidas por demócratas", como Kenosha, Minneapolis, Portland, Chicago e Nova York.
"Esquerda radical"
"Ninguén estará a salvo nos EUA de Biden", dixo, cuestionando as propostas da "esquerda radical" do candidato demócrata de investir en proxectos comunitarios e en asociacións veciñais dos barrios máis humildes do país, no canto de destinalo aos corpos policiais.
"Cómpre devolver o poder ás forzas da orde. A Policía ten medo a actuar. Non podemos permitir que o crime goberne", dixo Trump. "A abafadora maioría dos axentes da Policía neste país son nobres, valentes e honorábeis", engadiu.
Ante as demandas das minorías Trump sostivo que foi o mellor presidente para a comunidade negra desde Abraham Lincoln. "Fixen máis polos negros en catro anos que Biden en 47 anos de carreira política", manifestou.
