Fiat Chrysler anunciou que vai investir mil millóns de dólares en Estados Unidos. Un anunciou que chega ao tempo que desde Volkswagen abren as portas a producir coches eléctricos en EUA. Poucos días antes, Ford anunciaba que suspendía a construción dunha factoría en México –que suporía 1.600 millóns de dólares- e que destinaba 700 millóns a reforzar a súa planta de Michigan. Os medios norte-americanos pregúntanse se estas decisións son unha resposta da industria do automóbil ante as ameazas de Donald Trump, que ten advertido a empresas do sector contra plans de deslocalización, ameazando con maiores aranceis e taxas para os seus produtos.
O grupo italo-estadounidense Fiat Chrysler anunciou este domingo que ía investir mil millóns de euros en 2 das súas plantas en EUA e que crearía por volta de 2.000 empregos en Michigan e Ohio. Unha parte desta inxección económica destinarase a habilitar unha das plantas para poder fabricar nela un dos modelos que actualmente se ensambla en México. Fiat Chrysler afirma que este anuncio corresponde á segunda fase dun plan de industrialización que se difundiu en xaneiro de 2016.
A isto engádese que desde o grupo alemán Volkswagen, que este domingo ratificou que manterá as súas plantas en México, comprometeuse a producir coches eléctricos en Estados Unidos. Tamén insinuou que poderían ampliar a factoría que posúen en Tennessee, onde traballan 3.200 persoas e na que se fabrica o modelo Passat.
