O Goberno do Afganistán informou onte de que a semana pasada fora a máis mortífera para as súas forzas de seguridade en 19 anos de conflito. Os ataques talibáns deixaron 291 falecidos e 550 feridos. Segundo indicou o Consello de Seguridade Nacional, Javid Faisal, os ataques deixaron ademais 42 civís mortos e 106 feridos, segundo os datos gobernamentais recollidos por axencias internacionais.
Non obstante, o grupo insurxente négao, nun momento en que ambas as partes se preparan para o inicio do diálogo intra-afgán por primeira vez en case dúas décadas. Ambas as partes están de acordo en que as conversas se desenvolvan en Catar, onde en febreiro pasado os taibáns xa chegaron a un pacto cos Estados Unidos para a retirada das súas tropas e as dos seus aliados en 14 meses.
"Estamos sorprendidos. En lugar de ser esta a semana da paz, en que [os talibán] deberían traballar pola paz, en cambio, non deron ningún paso cara á paz, senón que aumentaron a guerra a un nivel sen precedentes nos últimos 19 anos", criticou Faisal.
"O compromiso dos talibán por reducir a violencia está baleiro de significado e as accións deles son incoherentes coa súa retórica de paz", agregou.
"Cifras falsas"
Para os talibáns, "a publicación de tales informes por parte do inimigo busca danar, crear obstáculos e atrasar o proceso de paz", afirmou o portavoz insurxente, Zabihullah Mujahid, que cualificou os datos de "falsos".
"Nunca publicaron a cifra real de vítimas nos últimos 19 anos, mais agora aumentan de 50 a 500 para crear obstáculos. Esa cantidade de ataques non se levaron a cabo na última semana. Houbo ataques, mais foron actos defensivos", asegurou.
O Goberno tamén asegura manter unha "posición defensiva" desde a tregua que mantiveron ambas as partes entre o 24 e o 27 de maio, coincidindo cos festexos polo final do mes sagrado musulmán do Ramadán e co obxectivo de facilitar as negociacións intra-afgás.
