Unha multitude chegada de distintos puntos do país concentrouse esta cuarta feira en Chimoré para recibir o ex presidente de Bolivia Evo Morales nesta localidade da rexión de Cochabamba, onde o tamén antigo líder sindical iniciou a súa actividade política. Chimoré e o último lugar que viu Morales, xusto onte hai una ano, cando un avión da forza aérea mexicana o trasladou fóra do territorio boliviano, pouco despois de que os militares forzasen a súa dimisión no medio das violentas protestas polas acusación de roubo das eleccións presidenciais.
Na repetición deses comicios, o pasado 18 de outubro, Luis Arce, candidato do Movemento ao Socialismo (MAS) de Morales, impúxose cunha ampla vantaxe. Na toma de posesión, o pasado domingo, houbo representación política galega. Foi da man de Ana Miranda, portavoz do BNG na Unión Europea e gran coñecedora dos asuntos internacionais, especialmente dos relativos a América Latina.
A formación nacionalista ─única presenza da Galiza en La Paz─ recibiu o convite para o acto como agradecemento ao apoio mostrado a Evo Morales durante os sucesos que provocaron o seu exilio en México, primeiro, e na Arxentina, despois; e tamén pola "firme condena ao golpe de Estado", di a Nós Diario Miranda, que cualifica a boliviana de "nación irmá" e o Goberno do MAS ─"socialista, que representa os pobos orixinarios, soberanista en cuestións sociais e económicas, e antiimperialista"─ como un referente.
"Era importante estar alí pola defensa que Bolivia fai dos dereitos dos pobos, cunha Constitución que recolle a plurinacionalidade do Estado, con máis de 40 nacións, que recoñece todas as linguas e o dereito deste pobos a gobernaren os seus recursos", afirma a representante do BNG, en relación á relevancia da presenza galega no acto. "E tamén porque cumpría mostrar o noso apoio ao antifascismo", engade.
"Tensión nas rúas"
Segundo relata, nos días previos e na propia xornada da toma de posesión, "había moita tensión nas rúas" ante a posibilidade de que os simpatizantes dos partidos da oposición opostos ao Goberno de Arce provocasen altercados. Con todo, arredor de 5.000 organizacións da sociedade civil chegadas de toda a xeografía boliviana atenderon a chamada do MAS e acudiron a La Paz como medida disuasoria e para defender o proceso. De feito, acabaron desfilando no acto, diante do novo presidente.
Cumprido o trámite institucional, agora toca mirar cara ao futuro tras un ano de turbulencias e nove meses dun Goberno interino que, sinala Ana Miranda, "deixou en banca rota varios sectores e privatizou empresas, ademais de anular a praza de moitísimos funcionarios" designados durante os mandatos de Evo Morales. É dicir, ficaron sen traballo.
E, sobre todo, "houbo moito exilio e moita represión", apunta. "As persoas que non marcharon pasárono moi mal e choran cada vez que lembran estes meses", relata. Mais Miranda quédase cun sentimento de Bolivia: "o orgullo que mostran como pobo tras superar un golpe de Estado".
