Un caza F-22 estadounidense derrubou este sábado un obxecto voador non identificado detectado ao norte de Canadá tras recibir o visto e prace do primeiro ministro canadense, Justin Trudeau.
"Ordenei derrubar calquera obxecto non identificado que violase o espazo aéreo canadense. O NORAD derrubou un obxecto sobre o Yukón", explicou Trudeau en Twitter en referencia ao Mando de Defensa Aeroespacial de Norte América das Forzas Armadas estadounidenses.
I ordered the take down of an unidentified object that violated Canadian airspace. @NORADCommand shot down the object over the Yukon. Canadian and U.S. aircraft were scrambled, and a U.S. F-22 successfully fired at the object.
— Justin Trudeau (@JustinTrudeau) February 11, 2023![Publicidade 196050]()
"Aparellos canadenses e estadounidenses foron mobilizados. Un F-22 estadounidense disparou con éxito contra o obxecto", engadiu Trudeau. "Falei esta tarde co presidente Joe Biden. Forzas canadenses recuperarán e analizarán os restos do obxecto", indicou.
Non identificado
Este novo obxecto estaría a sobrevoar a gran altitude o territorio do Yukón, unha rexión fronteiriza con Alaska. O NORAD confirmara previamente que estaba a facer un seguimento dun obxecto voador non identificado no norte de Canadá, sen que nun primeiro momento transcenderon máis detalles.
A ministra de Defensa de Canadá, Anita Anand, avanzou máis detalles este domingo. Era "un obxecto cilíndrico pequeno".
Ademais explicou que o aparello voaba a uns 40.000 pés de altitude, uns 12,2 km, e que foi derrubado debido ao risco que supoñía para a aviación civil, a uns 161 km da fronteira con Alaska, informou a televisión pública canadense, a CBC.
"Quero asegurar á xente do Yukón que en ningún momento a súa seguridade estivo en risco", afirmou o ministro principal do Yukón, Ranj Pillai. "Quero felicitar ao primeiro ministro por actuar de forma decidida para protexer á xente do Yukón e a todos os canadenses", engadiu.
Máis obxectos voadores
Aínda non se sabe se este novo obxecto está relacionado co globo espía chinés derrubado a semana pasada no Atlántico tras atravesar América do Norte ou con outro obxecto derrubado esta sexta feira sobre Alaska. China asegura que o primeiro era un globo meteorolóxico que se desviou fortuitamente.
Con todo, esta sexta, Washington anunciou sancións contra seis organismos chineses vinculados á industria aeroespacial dese país en resposta á presenza deste globo e o secretario de Estado, Antony Blinken, cancelou unha visita a China.
