Usando un símil futbolístico, Trump vai camiño de gañar as eleccións presidenciais de novembro sen baixarse do autobús. Ou por incomparecencia do rival, seguindo coa alegoría deportiva. O caos dos caucus de Iowa, sumado á máis que previsíbel sentenza absolutoria do Senado, hoxe, na votación final polo impeachment, deixan ao presidente estadounidense o camiño expedito para anovar o mandato por catro anos máis.
"Gran vitoria para nós en Iowa esta noite. Grazas!", escribiu Trump na súa conta do Twitter na noite da segunda feira. En teoría facía referencia á súa esmagadora vitoria nos caucus republicanos, onde logrou 31.874 votos (97,14%). Mais os seus seguidores intuíron xa aí unha chiscadela á desfeita dos demócratas.
Trump marchou durmir, e cedo pola mañá comezou a chiar sen sutilezas: "O caucus demócrata é un desastre sen paliativos. Nada funciona, exactamente igual que como xestionan o país (...) A única persoa que pode reivindicar unha gran vitoria en Iowa a pasada noite é 'Trump'".
Non lle falta razón. O Partido Demócrata concedeulle ao líder republicano un primeiro triunfo electoral coa súa calamitosa xestión do reconto, adiado por problemas técnicos coa aplicación informática ─utilizada por primeira vez─ que provocou que os datos reflectisen "incongruencias".
Tal e como escribiu onte a prestixiosa politóloga Pippa Norris, fundadora do Proxecto pola Integridade Electoral e autora do libro Cultural Backlash: Trump, Brexit and Authoritarian Populism, "o anuncio en tempo dos resultados é un principio básico da xestión electoral". Neste sentido, cuestionouse que se diría no caso de que "este atraso se dese en Kenya ou Bielorrusia".
A información íntegra pode ser consultada na edición en papel de Nós Diario, á venda nos quioscos, ou na súa lectura na nube.