A misión da OTAN en Kosovo (KFOR) informou esta segunda feira dun incremento nas súas actividades patrulleiras en todo o territorio, incluíndo o norte, que está a ser escenario de tensións entre Kosovo e Serbia pola política de matrículas dos coches.
A última crise entre Belgrado e Pristina vén das friccións polos controis policiais kosovares, en cumprimento da norma de retirar as matrículas serbias dos vehículos que ingresan ao enclave e instalar unhas placas temporais kosovares. A medida aplícase en reciprocidade por outra acción similar serbia.
A disputa foi aumentando a tensión nas últimas semanas, mesmo con bloqueos de estradas e ataques aos postos de control kosovares.
A KFOR é a misión máis lonxeva da OTAN e conta tamén coa apoio da UE. Permanece no territorio kosovar, que Serbia considera unha provincia propia, desde a intervención militar da Alianza Atlántica a finais da década de 1990. O seu obxectivo é garantir a seguridade das comunidades que habitan a zona, a maioría albano-kosovar e a minoría serbo-kosovar.
Exército en alerta
A decisión da KFOR chega un día despois de que o presidente serbio, Aleksandar Vucic, advertise o secretario xeral da OTAN, Jens Stoltenberg, de que interviría en Kosovo se a poboación serbo-kosovar se ve ameazada.
O Exército serbio aumentou o seu nivel de alerta e, segundo informaron os medios locais, varios avións e helicópteros militares sobrevoaron a zona próxima á fronteira.
Vucic exixiu a retirada dos corpos especiais da Policía kosovar da fronteira para sentar a negociar, mentres que desde Pristina defenden o despregue despois de que un edificio público ardese e o lanzamento de granadas ─sen estourar─ contra outro.
