Pablo Iglesias deixou esta mañá dúas mensaxes sobre o pleno do Parlament en que se aprobou a lei do referendo. A primeira, que o Goberno español debe desbotar a vía represiva na abordaxe do problema catalán e debe procurar unha saída "política" e non "parapetarse detrás das leis". A segunda, que a deputada que discriminou entre as bandeiras española e catalá -retirando aquela e deixando estas no Parlament- debería pedir "desculpas" polo seu aceno.
Iglesias tamén deixou claro que a súa formación non apoia o referendo do 1-O: "O que ocorre en Catalunya resólvese cun referendo con garantías", isto é, cun referendo pactado con Madrid, perspectiva neste momento materialmente imposíbel dado o enroque centralista do gabinete Rajoy.
O líder das confluencias pide, en todo caso, a Rajoy que "non se escude na lei e na Constitución". "Non utilicemos nen a policía nen os xuíces para resolver un problema político. Un dirixente que se escuda tras os xuíces ou tras a lei é irresponsábel. Hai que escoitar. A actitude de búnker dalgúns tennos levado a esta situación".
Resposta de Àngels Martínez
Inquerida ao respeito -"vosté vai pedir desculpas", a parlamentar de Podem deixou claro que "non". "A miña bandeira española é a republicana. É pola que loitou o meu pai. É pola que morreron moitos familiares meus. É a bandeira que toda a vida defendín. Evidentemente a miña bandeira republicana non a retiraría nunca, ao contrario, o que quero é que volte", dixo.