Após varias semanas da polémica suscitada pola demanda a representantes do Govern de Catalunya co gallo do 9-N, Eduardo Torres-Dulce anunciou a súa demisión como fiscal xeral do Estado.
Segundo o comunicado remitido polo Ministerio Fiscal a decisión de Torres-Dulce responde a "motivos persoais", como el propio tería manifestado. Porén, a súa saída prodúcese pouco despois do conflito aberto entre a Fiscalía estatal e a catalá arredor da querela contra representantes da Generalitat após o proceso consultivo do 9 de Novembro.
Esta segunda feira o Tribunal Superior de Xustiza reúnese para estudar a presentación ou non da devandita demanda. Torres-Dulce volverá a ocupar, logo da súa marcha, a praza que posúe na Fiscalía do Tribunal Constitucional.
