O Ministerio de Defensa puxo en mans da Fiscalía do Tribunal Superior de Xustiza de Madrid o chat de ex militares que envían cartas a Filipe VI. Así o avanzou a Cadea SER. Entre as cousas que din os ex militares neste grupo de WhatsApp, hai defensas de golpes militares e chamamentos a fusilar "a 26 millóns de fillos de puta”.
Así, o Ministerio de Defensa enviou á Fiscalía a información publicada por Infolibre por se os feitos fosen constitutivos de delito cometido "por persoas que ademais puidesen atribuírse a condición de militares en activo, sen selo”.
Desde o departamento de Margarita Robles sosteñen que "corresponde ao Ministerio Fiscal investigar a súa eventual relevancia penal" e tamén "para salvagardar a honorabilidade das Forzas Armadas".
"A súa conduta exemplar non ten nada que ver con manifestacións que repugnan respecto debido a unha sociedade democrática, pluralista e baseada na liberdade política e ideolóxica", aseguran desde o Ministerio.
Desde o departamento de Robles sinalan que vixían os movementos destes ex militares pola súa misiva a Felipe VI, a quen queren facer cómplice das súas posicións.
Con todo, subliñan que están retirados e que non existe, por tanto, unha posibilidade de ‘contaxio’ na actual composición das Forzas Armadas españolas.