Salto cualitativo no confronto do Estado Islámico con Ankara, após o masacre das primeiras horas de 2017 no Raíña, un dos locais nocturnos máis elitistas de Estambul. O Daesh emitiu un comunicado singularmente duro con Turquía e cualificou o autor do atentado como "heroe militar do Califato".
A reivindicación do ataque produciuse case en paralelo coa detención de 8 persoas suspeitosas de teren participado dalgunha forma na preparación do masacre. O seu autor, porén, continúa fuxido, embora as pesquisas policiais avanzan, até o ponto de os investigadores xa teren unha especie de retrato robot -a partir das gravacións das cámaras de seguranza-. A policía pensa que xa deu tamén coas pegadas deixadas polo terrorista na escena do crime.
Nun comunicado emitido esta mesma segunda feira, o Estado Islámico aponta ameazador a Ankara: "O goberno de Turquía debería saber que o sangue dos musulmáns, aos que ten no foco cos seus planos e as súas armas, causará un incendio na súa propia casa e farao para dar cumprimento á vontade de Deus".
Esta é a segunda vez no que vai de ano en que o Daesh reivindica un atentado en solo turco e faino após Ankara ter copatrocinado con Moscova un cesar ao fogo na guerra de Siria
