Cuba fai un donativo de millares de vacinas ao pobo saharaui

Este donativo chega no contexto do aniversario 46 da creación da República Árabe Saharauí Democrática, como evidencia do apoio permanente de Cuba á causa do pobo saharauí por recuperar os seus territorios e alcanzar a paz
Cuba doará doses da vacina Soberana 02. (Foto: Europa Press)
photo_camera Cuba doará doses da vacina Soberana 02. (Foto: Europa Press)

Como expresión das “excelentes relacións de cooperación bilaterais”, Cuba doou un lote de 458.000 doses da vacina Soberana 02 para uso pediátrico á República Árabe Saharauí Democrática (RASD).

Destinado ao combate á pandemia da COVID-19, o envío do fármaco cubano ao país africano “leva consigo o agarimo de todo o pobo cubano, en especial dos seus traballadores e científicos da saúde” que obtiveron tres vacinas, e seguen a traballar con outros dúas candidatas para que alcancen o seu rexistro, pronunciou Déborah Rivas Saavedra,  viceministra de Comercio Exterior e o Investimento Estranxeiro (Mincex).

Nese sentido, Yuri Valdés Balbín, director adxunto do Instituto Finlay de Vacinas (IFV), sinalou que é motivo de gran satisfacción que “a nosa vacina Soberana vai poder chegar á RASD”.

Á súa vez, Valdés Balbín transmitiu que o IFV, do mesmo modo que todas as institucións de Biocubafarma e de todo o sistema de ciencias do país están “ao dispor da nación saharauí e de todas as poboacións do mundo”.

Así mesmo, o embaixador extraordinario e plenipotenciario da  RASD, Mohamed Salec Abdesamad, expresou o seu agradecemento, en nome do seu goberno por este donativo que “demostra, máis unha vez, a solidariedade da Illa que historicamente apoiou a loita do pobo saharauí para culminar a liberación do seu territorio, lograr a soberanía total e a paz”.

“Este pobo irmán, coa súa constante solidariedade, fai unha demostración ao mundo da súa capacidade científica exemplar a pesar do bloqueo extremo dos EUA”, dixo o diplomático.

Até o 22 de febreiro deste ano, 89,1 % (9.873.957 persoas) da poboación cubana tiña aplicado o esquema completo de vacinación. Ao concluír o mes de xaneiro, 1.600.000 crianzas cubanas foran inoculadas, o que sitúa o país caribeño como o primeiro do mundo que concluíu a campaña de vacinación infantil contra a Covid-19.

Comentarios