Os Mossos d' Esquadra investigan o envío dunha carta con balas dirixida á presidenta da Comunidade de Madrid e candidata do PP nas eleccións madrileñas, Isabel Díaz Ayuso.
O suceso coñeceuse nas últimas horas desta terza feira e descoñécese a identidade do autor do envío. Nesta ocasión, os controis de Correos detectaron as balas en Barcelona antes de que o sobre chegase a Madrid.
Este paquete mandouse sen remitente e aínda se descoñece o tipo de proxectís e se contiñan algunha mensaxe. Ademais, a empresa tamén interceptou en Madrid un segundo envío con munición que tiña como destinatario a Dirección Xeral da Garda Civil, que preside Carmen Gámez, segundo confirmaron fontes do Ministerio do Interior. Gámez xa foi obxecto dunha ameaza similar a semana pasada.
O sobre, detectado no Centro de Tratamento Automatizado de Correos en Vallecas, contiña catro proxectís. Este feito foi trasladado xa polo Ministerio do Interior á Presidencia da Comunidade de Madrid e as forzas de seguridade xa o están investigando.
"A importancia que ten é ningunha"
Díaz Ayuso asegurou que se enterou da noticia pola prensa e, durante unha entrevista en Trece recollida por Europa Press, sinalou que "perante a violencia, serenidade e desprezo". "A importancia que ten é ningunha", aseverou a presidenta madrileña. "Esta xente busca o seu minuto de gloria. Non lles vou a dar o gusto", engadiu.
