O cono do volcán da Palma rompeu no mediodía deste sábado 25 de setembro, deixando unha coada enorme que se dirixe cara ao mar, segundo o Instituto Xeolóxico e Mineiro de España (IGME) que captou con imaxes de drons.
Nun vídeo difundido en redes, o xeólogo Carlos Lorenzo informou de que as imaxes mostran perfectamente que o cono está roto.
"Rompeu pola parte suoroeste e deixa unha coada enorme de bloques moi grandes desprazándose pola ladeira en dirección cara ao mar", explicou Lorenzo.
O anuncio do Instituto Xeolóxico e Mineiro de España-CSIC chegou pouco despois de que o Instituto Volcanolóxico de Canarias (Involcan) alertase da apertura dun novo foco de emisión desde a súa conta de Twitter.
Este foco novo abriuse nas horas centrais deste sábado máis ao oeste do foco principal. Pola súa banda, a coada de lava que apareceu onte, sexta feira, está a discorrer por encima da que saíu nos últimos días, sendo máis fluída e máis rápida que as primeiras coadas da erupción.
A lava cubriu desde que comezou a erupción no 19 de setembro un total de 190,7 hectáreas destruíndo até o momento 420 edificacións, ademais de 16 quilómetros de estradas, segundo os últimos datos do satélite do programa Copernicus da Unión Europea.
Imagen a las 16.30 (hora canaria) de la #eruptionlapalma / Picture at 4.30 p.m. (Canarian time) of the #lapalmaeruption pic.twitter.com/4uLbXL0opt
— INVOLCAN (@involcan) September 25, 2021