A Fiscalía Xeral de Arabia Saudí anunciou onte que cinco persoas acusadas do asasinato do xornalista Jamal Khashoggi foron condenadas á pena de morte. No entanto, Saud al-Qahtani, ex asesor do príncipe herdeiro, Mohamed bin Salman, foi finalmente liberado ao non seren presentados cargos na súa contra, informan as axencias internacionais.
Na lectura do fallo xudicial, o voceiro da Fiscalía, Shalaan Shalaan, sinalou que outras tres persoas acusadas de estaren implicadas nos feitos foron sentenciadas a penas que suman 24 anos de prisión.
Khashoggi morreu a mans de funcionarios sauditas dentro do Consulado do país árabe na cidade turca de Estambul. O xornalista, crítico co réxime e especialmente coa xestión de Mohamed bin Salmán (entre outros temas, opúxose á intervención no Iemen), acudiu ás dependencias consulares o 2 de outubro de 2018, co fin de tramitar a documentación necesaria para poder casar coa súa prometida, e xa nunca máis volveu saír con vida.
"Antítese da xustiza"
Segundo informara a prensa turca, os restos mortais de Jamal Khashoggi nunca chegaron a aparecer xa que, supostamente, o seu cadáver foi desmembrado e sacado secretamente da legación diplomática. O asasinato de Khashoggi provocou as críticas internacionais. A CIA e algúns gobernos occidentais sinalan o príncipe herdeiro como o indutor do asasinato.
j) Bottom line: the hit-men are guilty, sentenced to death. The masterminds not only walk free. They have barely been touched by the investigation and the trial. That is the antithesis of Justice. It is a mockery.
— Agnes Callamard (@AgnesCallamard) December 23, 2019![Publicidade 195255]()
Segundo afirman persoas expertas na materia, o proceso foi "a antítese da xustiza". A relatora da ONU sobre dereitos humanos Agnes Callamard, nun fío no Twitter, desenvolve esa valoración, que resume cun "os executores son culpábeis e condenados a morte. Os indutores non só saen libres, senón que apenas foron investigados".
