Comezan sete días de alto o fogo no Sudán

Esta segunda feira ás 21.45 horas entrou en vigor o alto o fogo pactado polo Exército do Sudán e o grupo paramilitar Forzas de Apoio Rápido (FAR), segundo un comunicado emitido por Arabia Saudita e polos Estados Unidos de América, que terían mediado no conflito. Trátase dunha tregua que durará sete días e que buscaría "facilitar a chegada e a distribución da axuda humanitaria, restaurar os servizos básicos e retirar as forzas dos hospitais". Igualmente, acordaron tamén "facilitar o acceso e o paso seguro da axuda e do persoal humanitario para permitir o fluxo da axuda sen obstáculos dos portos ás persoas necesitadas". As dúas forzas enfrontadas no Sudán xa anunciaran múltiples treguas, aínda que non se concretou ningunha de maneira prolongada e efectiva sen violacións por parte de ambos os axentes implicados, resaltan medios locais. De feito, e a pesar de que o acordo de alto o fogo iniciado na segunda feira xa foi asinado na noite do pasado sábado na cidade portuaria saudita de Yeda, durante a xornada do domingo aínda se desataron enfrontamentos entre o Exército do Sudán e as FAR. A este respecto, as Forzas Armadas emitiron unha declaración na que sinalaron que atacaron concentracións da milicia rebelde no norte e centro da cidade de Bahri e no sur de Khartum, a capital do Estado africano. Fontes do Exército indicaron que, como resultado destes operativos foi destruída unha gran cantidade de vehículos armados e camións cargados de municións, ademais de que "un número indeterminado de rebeldes morreron ou resultaron feridos" nesa fin de semana. O conflito no Sudán causa máis de 300 mortes As chaves do conflito O Exército sudanés e as FAR protagonizan unha loita polo poder desde hai meses, mais a guerra estalou o 15 de abril desatada polo intento de constituír un Exército unificado. O Sudán atópase no medio dun proceso de transición democrática que busca pór fin á crise política que provocou o golpe de Estado co que o xefe supremo do Exército, Abdel Fattah al Burhan, xunto co xefe das FAR, Muhammad Hamdan Dagalo 'Hemedti', destituíu o Goberno civil de transición que dirixía o Estado despois da revolución sudanesa. No marco desta transición, o pasado 5 de decembro de 2022, militares e civís asinaron un acordo que definía os pasos para estabelecer un Goberno civil que substitúa o actual militar. Non obstante, a sinatura do documento definitivo ficou posposta até en dúas ocasións por falta de consenso sobre a creación dun Exército unificado coas FAR, un dos puntos do acordo que pretende "resolver a crise no país". Así, detrás da guerra no Sudán estaría principalmente un conflito de egos entre o xefe supremo do Exército, Al Burhan, e o xefe das FAR, Hemedti, noutrora "amigos", hoxe en día enfrontados nunha loita polo liderado do poder militar. O primeiro aspira a integrar as FAR nas forzas armadas sudanesas e ser o maior mandatario do Estado; Hemedti, na mesma liña, tamén querería aprehender todo o poder. Con todo, analistas internacionais, como o director de investigación do Centro Africano de Estudos Estratéxicos, Jospeh Siegle, sinalan a intereses externos nas minas de ouro que posúe o Estado africano. Un país que, devastado polos conflitos, leva anos sumido na pobreza, mentres a explotación do mineral alcanza cifras récord. Os detractores de Hemedti sosteñen que se está a facer rico coa explotación de minas de ouro co apoio de milicias rusas, e acúsano de facilitar a apertura dunha base naval rusa no mar Vermello. A ONU alerta de que a guerra entre o Exército Sudanés e as FAR pode tornar en conflito étnico O ouro sudanés estaría a financiar ambas as partes dunha lide que, segundo a ONU, suma xa máis de 700 mortes, 5.000 persoas feridas e máis de 1,1 millóns de desprazamentos internos e refuxiadas nos Estados veciños, na súa maioría mulleres e crianzas. Tendo en conta esta situación, o Consello de Seguridade da ONU sostivo na segunda feira unha xuntanza para examinar a situación no Sudán, após coñecer un informe que presentou o secretario xeral do organismo, António Guterres. Nesta xuntanza, o enviado especial da ONU no Sudán, Volker Perthes, declarou que "a crecente etnicización do conflito corre risco de expandirse e de prolongarse, coas implicacións que iso supón" para a rexión africana. Perthes afirmou que xa había sinais de que a guerra sudanesa ameazaba con dividir o Estado en liñas étnicas. "Nalgúns puntos do Sudán, os combates entre as dúas formacións armadas agudizáronse en tensións comunais ou desencadearon conflitos entre grupos étnicos", dixo. Así, se o alto o fogo se mantén, evitar a escalada da etnicización da contenda unha das prioridades da ONU. A ONU urxe todos os países a acoller as persoas que logran fuxir da guerra do Sudán Os ataques céntranse en Khartum Khartum, Bahri, Omdurman e Al-Fashier (capital de Darfur) concentraron os ataques desta fin de semana no Sudán. (Foto: Nós Diario) Desde o inicio do conflito sudanés o 15 de abril de 2023, a loita armada concentrouse principalmente na capital do Sudán, Khartum, máis tamén ao norte, en Bahri, e en Omdurman e Darfur. O número de refuxiados incrementa día a día, con Estados como Sudán do Sur véndose obrigados a estabelecer novos campos de refuxio ante a alta demanda. Porén, o director de axuda humanitaria da ONU, Martin Griffiths, após visitar Porto Sudán afirmou que "a vontade para rematar a loita aínda non existe". Máxima tensión no Sudán, ao bordo da guerra civil