Coidado co 'can' solto en Castela e León

Por Castela e León anda solto un 'can' sen correa e bozo. Para algúns non é perigoso mais o 'canciño' vai medrando. Xa ten afiados dentes, pode morder e ladra acotío dende a súa casopa de Valladolid. Na década dos primeiros 80 alcumouse 'Fachadolid'. Contra vento e marea o alcume non foi desdebuxado polo paso do tempo; sobrevive no subconsciente de moita xente que lembra a cidade: berce do casal dos reis Isabel e Fernando; da fusión de Falange Española e as Juntas de Ofensiva Nacional Sindicalista (FE e JONS) en 1934; de Onésimo Redondo 'o Caudillo de Castilla'; da laureada outorgada por Franco; da conivencia das autoridades provinciais coa Brigada Político Social (BPS) nos tempos da transición; dos 20 anos na alcaldía de León de la Riva... Mais tamén están os demócratas, as fortes loitas obreiras de FASA, construción, Michelín, Sava... e as folgas de estudantes o gobernos do concello polos socialistas. Abofé, máis de 40 anos despois, os cachorros de entón de Fuerza Nueva non andan a liortas polas rúas, non botan lume a librarías, cines, sedes de partidos, carros... pero algún daqueles violentos mozos trocaron a camisola azul coa galiña bordada no peito e os ferros, puños americanos e as navallas agochadas en traxes de bo pano e garabatas. Hoxe ocupan cadeira no parlamento da Comunidade que des-gobernan dende abril de 2022; o PP en comadrada co Vox, grazas á covardía de Alberto Núñez Feixoo. A Junta de Castela e León, con sede en Valladolid, é o primeiro Goberno da extrema dereita no país. A banda de Abascal A banda que dirixe Santiago Abascal ten tres consellerías das dez do executivo autonómico: Industria, Comercio e Emprego (Mariano Veganzones); Agricultura, Gandería e Desenvolvemento Rural (Gerardo Dueñas) e Cultura, Turismo e Deportes (Gonzalo Santonja). No tempo que levan no des-goberno teñen deixado unha forte pegada de homófobos, racistas e machistas. Ben por dicir que se hai paro é porque a xente non quere traballar, retirar as subvencións a centrais sindicais oficiais, atacar a política do chamado 'pacto social', disolver organismos coma o Servicio de Relaciones Laborales, dedicar moito máis tempo a touradas, caza e misas que a teatro, exposicións, xornadas culturais; aínda que o titular da consellaría está en mans dun ex membro da esquerda abertzale que estivera detido, fora ao exilio e mantivera amizade con Rafael Alberti, José Bergamín. Un bo exemplo para o estudo de evolución ideolóxica. — Nas Cortes é o 'sheriff' e ninguén lle manda calar a boca Todo o que se diga é pouca cousa en relación co trapalleiro vicepresidente da Junta: Juan García-Gallardo Frings, o líder de Vox nestas terras que entrou no goberno de Castela e León, para rematar co 'despilfarro' do estado das autonomías. A realidade é que seu 'austericidio' reflíctese na partida dos Orzamentos de 2023 destinada a altos cargos, cun aumento do 12,5%. O vicepresidente cobra 80.741,24 euros, que é o equivalente ao 70% dos cartos destinados a investimentos pola vicepresidencia. E non facer outra cousa que rembumbiar. Un mestre. Unha copia de Hungría García Gallardo cando foi nomeado candidato tivo que limpar seus chíos. Un mestre do insulto que continuou cos seus compañeiros procuradores das Cortes. A Francisco Igea (Ciudadanos) ou Noelia Frutos (PSOE), a quen lle dixo: "Le responderé como si fuera una persona como todas las demás". Noelia é unha persoa con discapacidade. García-Gallardo provocou a última polémica, até agora, co aborto e os ataques a mulleres ás que quere facer escoitar os latexos do feto, ver as ecografías en 4D, etc. Medidas recollidas nun protocolo que foi copiado da lei antiaborto do goberno de Hungría de Viktor Orban. Nas Cortes é o 'sheriff'. Ninguén lle manda calar a boca. Ten máis forza que o presidente do PP Alfonso Fernández Mañueco, a quen dixo despois das eleccións: "O se aplican las políticas de Vox o el PP no gobernará en Castilla y León". Este señorito de faciana repugnante, xinete de cabalos e seareiro das touradas non ten funcións operativas; é vicepresidente executivo sen responsabilidades. Por iso ten tempo de lecer abondo para dicir as maiores burricadas. A vicepresidencia dedica 1,2 millóns (1.194.770 euros) a gastos de persoal para xestionar só 112.000 euros. Outros datos. A vicepresidencia destina o maior investimento a vítimas do terrorismo mentres García-Gallardo Frings está na Junta como na súa casa, rodeado de familiares de apelidos compostos. O director do gabinete, por exemplo, é José María Barrio Gil-Fournier, curmán do pai do vicepresidente, avogado de Burgos e Madrid que leva os negocios mafiosos da familia Ruíz Mateos. Hai que ser valentes e combater as inxustizas e desigualdades con mudanzas estruturais, políticas de esquerda de verdade. Non basta presumir de goberno "más progresista". Quen avisa non é traidor. Non vaia pasar como no conto de Augusto Monterroso: "Cuando despertó, el dinosaurio todavía estaba allí". E o 'can'?