A Caricom aborda os principais desafíos do Caribe

"As decisións que tomemos nesta reunión sobre cuestións como o cambio climático, a seguridade alimentar e o Goberno comunitario poden ter un efecto longo e positivo na rexión nos próximos 50 anos", defendeu na madrugada da quinta feira Carla N. Barnett, secretaria xeral da Comunidade do Caribe (Caricom), durante a súa intervención na inauguración da 44º Conferencia ordinaria de xefas e xefes de Goberno da entidade en Nassau, nas Bahamas. Con respecto ao quecemento global, a secretaria xeral destacou a “arremetida continua coa destrución causada polas tormentas, as choivas e a seca”, sinalando que é un dos principais desafíos xunta a suba dos prezos, porén, salientou que a Caricom “fixo como adoitamos facer, unímonos contra os retos”, poucos meses antes de chegar aos 50 anos de vida da institución, o “movemento de integración máis antigo que segue activo”, sostén a entidade. Entre os logros do último ano, Barnett fixo fincapé nos esforzos en Haití, facendo un chamamento a “axudar a todas as partes interesadas para garantir unha resolución da crise”, e na renuncia dos Estados Unidos ás sancións contra Venezuela que freaban a explotación dos campos de gas que comparte o país suramericano con Trinidad e Tobago, unha petición da Caricom. O organismo -na orixe centrado no Caribe británico- está composto por boa parte dos Estados espallados polas illas da rexión, e inclúe un socio en Centroamérica, Belice. Até 14 países e unha colonia do Reino Unido -Montserrat- están integrados, ao que hai que engadir cinco membros asociados, todos colonias británicas. A súa capital está fixada en Georgetown, á vez capital da República Cooperativa de Güiana. Unha das principais iniciativas da Comunidade é o Mercado e Economía Únicos do Caribe, que estabelece unha área de libre comercio entre 12 dos membros da entidade co obxectivo de coordinar as políticas económicas en favor dos países máis desfavorecidos da rexión para “compartir a prosperidade económica, social e cultural”, afirma a institución, que tamén estuda a súa posición no tocante á “reforma da arquitectura financeira global”. Seguridade alimentar Un dos eixos da xuntanza que remata hoxe é o debate sobre os avances no plan para alcanzar a seguridade alimentar e nutricional rexional. Unha das metas chave, marca a Caricom, é o desenvolvemento da produción propia para reducir até 2025 un 25% o custo das importacións de alimentos. Neste sentido, un informe desvelado pola entidade na véspera da reunión indica que a pesar da suba dos prezos dos alimentos a nivel mundial xa acadaron 57% deste obxectivo, cos niveis de produción de cacao, lácteos, carne, cultivos de raíz, froitas e aves por riba de 70% das cifras de produción determinadas para 2025. Como sinalou Barnett, o cambio climático tamén centra boa parte da cimeira, por unha banda analizando as implicacións rexionais dos resultados da Conferencia da Organización das Nacións Unidas sobre Cambio Climático que decorreu a finais de 2022 en Exipto (COP27), e pola outra estabelecendo o referente ao mecanismo de financiamento climático para as nacións máis vulnerábeis aos seus efectos, polo que foron convidados representantes da Organización Mundial de Comercio, o Banco de Desenvolvemento de América Latina e o Banco Africano de Exportacións e Importacións. Outro dos puntos da orde do día alude as crises que se superpoñen en Haití, membro da Caricom. “Ninguén de nós estará a salvo até que esteamos todos a salvo”, incidiu o primeiro ministro das Bahamas e presidente rotatorio da entidade internacional, Philip Davis, que reclamou “atención urxente” para pactar un calendario que “axude a avanzar cara a unha solución para o pobo haitiano”. Estas medidas deberían evitar “os fracasos dos esforzos pasados”, apuntou, reiterando que “calquera solución debe ser dirixida por Haití”, recolle The Nassau Guardian. O seu ministro de Asuntos Exteriores, Fred Mitchell, explicou que un dos puntos fundamentais do debate é a solicitude haitiana para despregar un continxente de tropas internacionais para frear o avance da violencia no país, após denunciar as organizacións en defensa dos dereitos humanos que en 2022 máis de 2.000 persoas foron asasinadas con armas de fogo en Haití. As febles capacidades militares na rexión para asumir en solitario ese obxectivo, xustificou Davis, explican o convite á Conferencia da Caricom ao presidente canadense, Justin Trudeau, que se desprazou ás Bahamas xunto a unha delegación dos Estados Unidos.“Todos nos beneficiaremos se Haití volve ser un Estado en pleno funcionamento”, insistiu o primeiro ministro das Bahamas. Intervención militar en Haití En Porto Príncipe existe un importante debate sobre a intervención estranxeira, unha posibilidade moi cuestionada polas forzas progresistas tras a solicitude internacional asinada polo primeiro ministro Ariel Henry, que chegou ao poder co apoio de Washington tras o asasinato do presidente Jovenel Moïse en 2021 e entre dúbidas sobre a súa lexitimidade. De dirixir os Estados Unidos a intervención en Haití sería a quinta invasión militar norteamericana no país.